И йикъара газетдин редакциядиз чи ватанэгьли Назим Исмаиловалай чар атана. Ана кхьенва:
“Гьуьрметлу редакция! За алай вахтунда республикадин дагълух райондин тади куьмекдин къуллугъда кIвалахзава. Коронавирусдин тIугъвалдин девирда заз са сефердани алава пул ганач. Алатай варцара зун талукь са шумуд идарадиз фена, амма пул тагунин себебдай кьил акъудиз хьанач. ТIалабзава квевай чирун: тади куьмекдин къуллугъда шофер яз кIвалахзавай заз алава пул къвезвани-къвезвачни? Эгер къвезватIа, мус гун лазим я?”.
Гьайиф хьи, чаз чар рекье тунвай касди вич гьинай ятIа, гьи идарайриз фенатIа кхьенвач…
Чна гъиле-гъилди и чарчикай Дагъустандин здравоохраненидин министерстводиз хабар гана. Анайни чна жаваб яргъалди гуьзетнач.
“Дагъустан Республикадин здравоохраненидин министерство куь тIалабуниз килигна, адахъ галаз алакъалу яз хабар гузва:
РФ-дин Гьукуматдин 2020-йисан 12-апрелдиз кьабулнавай 484-нумрадин къарардалди важиблу крар кьилиз акъудунай руьгьламишдай алава такьатар коронавирусдин садакай масадак акатдай цIийи азардихъ галаз женг чIугун патал кардик квай тади куьмекдин махсус бригадайрин шоферриз вацра (2020-йисан мартдилай октябрдалди) 25 агъзур манатдин кьадарда аваз гун къалурнава.
Россиядин Федерациядин Гьукуматдин 2020-йисан 30-октябрдиз кьабулнавай 1762-нумрадин къарардалди 2020-йисан ноябрдилай руьгьламишдай алава пулар медицинадин тади куьмекдин, чпи коронавирусдикди начагъ тир ксар азарханадиз агакьарунин карда иштиракзавай бригадайрин шоферриз нормативный са сменадай (и категориядин ксар патал нормативный са смена 8 сят я) 1 215 манат алава пул гун къалурнава.
РД-дин здравоохраненидин министрдин заместитель Р.Н.Шагьсинова”.
Жаваб электронный къайдадин къулуналди тестикьарнава.
«Лезги газет»
