Седредин  Жафарович  Жафаров. Къизилюрт шегьердин кьилин сад лагьай за­меститель яз кIвалахзавай адан тIвар Да­гъустанда гзафбуруз таниш я. Вичин вири уьмуьр къанун-къайда хуьниз, жемиятдин къуллугъда акъвазуниз бахшнавай къурушви хци и йикъара вичин 70 йисан юбилей къейдна.

Хейлин йисара К.Марксан тIварунихъ галай колхозда кIвалахай намуслу дагъви Жа­фар Жафарова вичин веледар хайи чIалан, чилин къадир авай халис ватанпересар яз чIехи авуниз кьетIен фикир гана. Ада вичин уьмуьрдин юлдаш Суьрегьидихъ галаз санал ругуд веледдиз — кьуд хцизни кьве рушаз тербия гана.

Рухваяр бубайрин дамах, Ватандин даяхар я лугьуда. И гафарин керчеквал, Жафароврин хизанда тербияламиш хьайи рухвайрин уьмуьрдин рекьерихъ галаз таниш хьайи­­ла, мад сеферда субут жезва. Абуру хайи хуьруьн тIвар неинки са Дагъустанда, гьакIни къецепатан уьлквейрани машгьурзава. Лагьана кIанда, стхайри — Жафароври вирида чпин уьмуьр къанун-къайда хуьдай органрихъ галаз ала-къалу авуна ва къенин юкъузни кьегьалвилелди Ватандиз къуллугъ авун давамарзава. Эскер Жафарова ФСБ-дин академия акьалтIарна. Алай вахтунда ада Урусатдин Туьркияда авай Векилханада сад лагьай секретарь яз кIва­лах­зава. Генерал Рамазан Жафаровани хейлин йисара жуьреба-жуьре уьлквейра Урусат-дин­ Яракьлу Къуватрин векил яз зегьмет чIугу­на. Эхиримжи са шумуд йисуз ада РД-дин Гьукуматдин Председателдин заместителдин везифаяр тамамарзава. Гьадани ФСБ-дин академияда кIел­на. Ризван Жафарова медицинадин академия акьалтIарнатIани, стхайрилай чешне къачуна, вичин уьмуьрни военный рекьихъ галаз алакъалу авуна. Ада Дагъларин уьл­кведин сергьятар хуьдай кьушунра военный духтур яз зегьмет чIуг­вазва.

Стхайрикай виридалайни чIехида — чи макъаладин кьилин игит Седредин Жафарова Саратов шегьерда милициядин школада, гуьгъуьнлай СССР-дин МВД-дин академияда чирвилер къачуна. Къанун-къайда хуьдай органрин къурулушда кIва­лахзавай йисара дирибаш къурушвиди Хасавюрт шегьердин ГАИ-дин начальникдин везифаяр тамамарна, Къизилюрт шегьердин ОВД-диз регьбервал гана. КIва-лахдин рекье дуьшуьш хьайи гьар са имтигьандиз Седредин Жафарова ви­кIегь-вилелди дурум гана, вичин тIвар­цIел леке гъидай крариз рехъ ганач, гьар са кардив гьахъ гваз эгечIна. Къе республикадин жуьреба-жуьре пипIера адаз ийизвай гьуьрмет и крарин нетижа я.

Пенсиядиз экъечIайдалай кьулухъ хейлин йисарин тежриба хьанвай Седредин Жафарович сиясатдал машгъул хьана. Адакай пуд сеферда Къизилюрт ше­гьер­дин Собранидин депутат хьана. 1999-йисалай къенин йикъалди лагьайтIа, ада шегьердин кьилин сад лагьай заместитель яз кIвалахзава.

Лагьана кIан­да, сад лагьай заместитель яз, Седредин Жафарова шегьерда къа­нун-къайда, жемиятдин хатасузвал хуьнин ме­сэлайрин патахъай жаваб гузва. Кьилди къа­чур­тIа, ада Къизилюртдин къанун-къайда хуьдай органрин кIва­лах­дал гуьзчивал тухузва, терроризмдиз, экстремизмдиз акси яз кьабулзавай серенжемра, тешкилзавай мярекатра иштиракзава, шегьердин “афгъанвийрин” советдин куратордин везифаяр кьиле тухузва. Же-гьилрихъ галаз кIвала­хуниз С.Жафарова кьетIен фикир гузва. Малум тирвал, эхиримжи йисара, интернетдикай менфят къачуна, рикIе чIуру ниятар авай ксарикай ибарат кIеретIри хейлин жегьилар чпин жер­гейриз чIугуна, дуьз ­ре­кьелай алудна. Абурун чилина гьатай гзаф кьадар жегьилар телефни хьана. Уьлкведин, регионрин дережада аваз кьабулзавай­ се­рен­жемрин нетижада и кардин вилик пад кьаз алакьнава, тах­сиркарвилерин кьадар тIимил хьана. ЯтIа­ни, бушвална виже къведач. И кар хейлин йисара МВД-дин къурулушда кIва­лах­­на­вай Седредин Жафаровани хъсандиз кьатIузва. Акьалтзавай несилриз дуьзгуьн тербия, Къизилюрт шегьердин жегьилриз жуьреба-жуьре рекьерай куьмекар гунай Седредин Жафаров РД-дин лайихлу насигьатчи лагьай тIварцIиз лайихлу хьана.

Седредин Жафаров датIана кIвалах­дин яцIа ава. Коронавирусдин тIугъвал пайда хьайидалай кьулухъ ада Къизилюртда кардик кутунвай Оперативный штабдиз регьбервал гузва. Имни еке жавабдарвал я. Оперативный штабди кьиле тухузвай кIвалахдилай, кьабулзавай къараррилай шегьердин агьалийрин сагъламвал аслу я. Гьавиляй ам и месэладив мукъаятвилелди эгечIзава.

Къейд ийин хьи, Седредин Жафаров полковник, сиясатчи хьиз, алимни я. Ада1992-йисуз “Защита прав человека в современном международном праве” темадай агалкьунралди юридический илимрин кандидатдин дережани хвена. Спортдин рекьяйни адахъ хейлин агалкьунар ава. Ам жегьил вахтунда боксдал маш­гъул хьана. 1973-йисуз адакай боксдай СССР-дин кIвенкIве­чивилин акъажунра гимишдин призер, 1974-йисуз СССР-дин учебный заведенийрин чемпион хьанай…

Бубади гайи насигьатар Седредин Жафарова вичин веледризни ганва. Уьмуьр­дин юлдаш Шагьнабатахъ галаз санал чешнелу хизан арадал гъана. Абурун хизанда чIехи хьайи пуд веледдини алай вахтунда чпин пешейрай намуслувилелди кIвалах­зава.

Седредин Жафарович Жафаров “Лезги газетдин” редакция патални багъри кас я. Хайи чIалал акъатзавай газетдин тираж артух хьуник вичин пайни кутазвай ам чи вафалу амадагрикай сад я.Баркал­лу ватанэгьлидихъ, чIехи дустунихъ чандин сагъвал, яргъи уьмуьр, хизандин хушбахтвал ва чIехи агалкьунар хьун чи мурад я. Юбилей мубаракрай, Седредин Жафа­рович!

Мегьамед  Ибрагьимов