2021-йисан 21-январдиз республикада шадвилин гьалара тарихдин метлеб авай чIехи вакъиа — ДАССР арадал атайдалай инихъ 100 йисан юбилей къейдда. Идан гьакъиндай 28-октябрдиз РД-дин Кьилин везифаяр вахтуналди тамамарзавай Сергей Меликова малумарна ва суварин мярекатриз гьазурвал акун патал тешкиллувилин комитет арадал гъана. Къведай йисуз республикадин вири шегьеррани районра шадвилин жуьреба-жуьре мярекатар кьиле тухуда­.  

Къейд. 1920-йисан 13-ноябрдиз Темирхан-Шурада (гилан Буйнакск) Да­гъустандин халкьарин Чрезвычайный съезддал Советрин Дагъустандин автономиядин гьакъиндай декларация кьабулна. Советрин гьукуматдин патай и документ гваз трибунадихъ миллетрин крарин рекьяй нарком И.В.Сталин экъечIна. Съездди Дагъустандин автономия рейсадвилелди кьабулна. РСФСР-дин ЦИК-дин Декретдин бинедаллаз ДАССР 1921-йисан 20-январдиз арадал гъана ва гьа йисан декабрдиз Советрин Виридагъустандин учредительный сад лагьай съезддал республикадин Конституция кьабулна. 1921-йисан 20-январдилай Дагъустан Республикади СССР-дин стха халкьарин хизандик кваз вичин къадим тарихдин цIийи чин ачухна.

И вакъиадиз гьазурвал акун яз, 26-ноябрдиз Ахцегь райадминистрацияда тешкиллувилин комитетдин заседание хьана. Ана рахай Ахцегь муниципалитетдин кьил Осман Абдулкеримова икI лагьана:

— Дагъустан Республика арадал атунин юбилейдиз талукь кьилин мярекатар Махачкъала ва Буйнакск шегьерра же­датIани, чкайрал чнани ам вири районэгьлийрин иштираквал аваз лайихлудаказ къейдна кIанда. Гьавиляй суварин серенжемриз виликамаз хъсан гьазурвал акуна, акьалтзавай несилдиз ватанпересвилин хъсан тарсар жеривал  жавабдарвиливди эгечIна кIанда. Сифте нубатда райцентрадани хуьрера сангигиенадин жигьетдай къайда тун чарасуз я.

Ахпа заседанидал тешкиллувилин комитетдин членри республикадин 100 йисан юбилейдин шадлухдай районда 2021-йисуз кьиле тухудай мярекатрин тахминан план-график веревирдна. Кьилди къачуртIа, фикирдик къведай йисалай райондин “ЦIийи дуьнья” газетда махсус рубрикадик кваз гьар са нумрада республика вилик тухуник чпин пай кутур ба­жарагълу ахцегьвийрикай кьилди-кьилди материалар чап авун, халкьдин милли парталринни хуьрекрин йикъар ва художественный выставкаяр кьиле тухун, районда жегьил пианистрин конкурс, чубанрин югъ, ичерин сувар ва спортдин акъажунар тешкилун, “Шарвили” эпосдин сувар, Ахцегьрин 1-нумрадин школадин 160 йисан юбилей къейдун, Цуькверин сувар арадал хкун, Кетин дагъдин кукIвал экъечIна, анал “Дагъустан Республикадин 100 йис!” махсус лишан хкажун, изобразительный искусстводин школа, спорткомплексдин ва ЦРБ дин цIийи дараматар ачухун, школайра юбилейдиз талукь вечерар, край чирдай музейда выставкаярни ачух тарсар кьиле тухун, зегьметдин ветеранар тир машгьур районэгьлийрихъ галаз гуьруьшар кьиле тухун производстводин зегьметдин, илимдин ва спортдин хилера тафаватлу ксар райондин ва республикадин дережадин наградайралди къейдун  ква.

Дашдемир  Шерифалиев