Ватандин ЧIехи дяведа гъалибвал къачуна хтайбурун жергеда Кьасумхуьруьн райондин КIахцугърин хуьряй тир Мирзебалаев Къурбанни авай.
Финляндиядихъ галаз дяве башламишайла, училищени куьтягьиз тахьана, женгера иштиракиз Мирзебалаев тухванай. Германиядин чапхунчийри чи Ватандал вегьейла, лейтенант Къурбан Къурбановича 296-полкуна алакъадин начальник яз къуллугъна.
Мирзебалаев Къурбанан женгерин рехъ Чехословакиядин чилел акьалтIна. Гвардиядин капитан, Яру Гъед ва маса орденринни медалрин сагьиб багърийри шадвилелди къаршиламишнай. Армиядин къуллугъ ада 1958-йисан сентябрдин вацралди давамарнай.
Офицерди Шамхалда авай аялрин колониядин начальник яз къуллугъна. Анай Мирзебалаев КПСС-дин Дагъустандин Обкомдиз къуллугъдал хкана ва Избербаш шегьердин горкомдин 1-секретарвиле тайинарна. Ина ада са йисалай артух вахтунда кIвалахна, ахпа ам обкомдин кьвед лагьай секретарвилиз хутахна. Ина са кьадар йисара къуллугъна. Амма дяведа хьайи кьван залан хирери кIвалах давамардай мумкинвал тунач. Ада ракьун рекьерин министерстводин алакъадин пешекарар гьазурдай курсарин начальниквиле кIвалах хъувуна.
1984-йисан июлдин вацра Мирзебалаев Къурбан рагьметдиз фена. Адаз са руш хьана. Медицинадин илимрин доктор Мирзебалаева Анна Къурбановна Санкт-Петербургда поликлиникадин заведующий я.
Сажидин Саидгьасанов
