2-декабрдиз чав залан хабар агакьна: яргъалди давам тахьай тIегъуьндик чи арадай Ватандин ЧIехи дяведин иштиракчи Ливауддин Къазибегован хва, Махачкъалада авай имам аш-Шафиидин тIварунихъ галай мискIиндин имам Тажидин Къазибегов акъатна.
Т.Л.Къазибегов 1948-йисуз Мегьарамдхуьре дидедиз хьана. Ана школа акьалтIарна, Дагъустандин пединститутдин физикадинни математикадин факультетдик экечIна. КIелдай йисара хьайи агалкьунриз килигна, институт куьтягьайла, ана кIвалахиз туна. Са йисуз, а девирда къанун тирвал, армияда, (Венгрияда), къуллугъна. Ахпа Ленинградда Герценан тIварунихъ галай пединститутдин математикадин анализдин кафедрадин аспирантурада кIелна, диссертация хвена. Саки 50 йисуз педуниверситетда тарсар гана.
Физикадинни математикадин илимрин кандидат, доцент Тажидин Къазибегова университетда кIвалахзавай чIавуз алгебрадай, рекъемрин теориядай, математикадин образованидиз талукь месэлайрин курсарай чирвилер гузвай. Адан гъилик кIелай гзаф кьадар студентрикай алай вахтунда жуьреба-жуьре къуллугърин сагьибар хьанва.
Лезги жемиятдин арада Тажидин Къазибегов неинки са алим, гьакIни диндин рекьяй муаллим, мискIиндин имам, Меккадиз гьаждал фенвай гьажи язни чидай. Адаз хъсандиз араб чIал чидай. Сирияда, Дамаскда, “Абу Нур” лугьудай Исламдин университетда имамрин дережа хкаждай пуд вацран курсарани кIелна. Тажидин Къазибегова педуниверситетдин араб чIалан кафедрада, цIуд йисуз ДГУ-дин востоковеденидин факультетда кардик квай Къуръан чирдай центрада кIвалахна. Эхиримжи йисара анин директор тир.
Алимдин къелемдикай математикадин, физикадин месэлайрай кхьенвай илимдин кIвалахрихъ галаз санал Ислам диндиз талукь хейлин макъалаяр хкатнава. Идалай гъейри, Тажидин Къазибегов араб чIалал кхьенвай ктабар лезги, урус чIалариз элкъуьрунални машгъул тир. Абурун арада “Бухарадин жевгьерар”, Абу Гьамид ал-Гъазалидин “Дуьз рекьин эвел”, гьадисрин вад томдикай ибарат тир кIватIалдин кьве том ва масабур ава.
Тажидин муаллим “Лезги газетдин” вафалу амадагрикай сад тир. Гьеле 90-йисарилай гатIунна газетдиз ада Ислам диндин месэлайрай кхьизвай хейлин макъалаяр акъатна. Тажидин Къазибегова редакцияда кьиле физвай жуьреба-жуьре мярекатра активнидаказ иштиракзавай, газет кхьинин рекьяй халкьдин арада таблигъат тухузвай.
Эхиримжи йисара ада Махачкъалада авай имам аш-Шафиидин тIварунихъ галаз мискIиндин имамдин везифаяр тамамарзавай. Идахъ галаз сад хьиз, ада мискIинда аялриз араб чIал чирдай курсар кардик кутунвай, жегьилрин арада марифатдинни ахлакьдин жигьетдай еке кIвалах кьиле тухузвай.
“Лезги газетдин” редакциядин коллективди Ливауддинан хва Тажидин Къазибегов рагьметдиз финихъ галаз алакъалу яз адан хизанриз, веледриз, вири мукьва-кьилийриз, дериндай хажалат чIугунивди, башсагълугъвал гузва. Тажидин муаллимдин экуь къамат чи рикIера амукьда.
