ГИБДД-дин пресс-къуллугъдай хабар гайивал, 26-ноябрдиз Махачкъалада, аялринни жаванрин автошколада, аялар аварийрик акатунин вилик пад кьуниз талукь, Дагъустанда сад лагьайди тир центр ачухна.
— Рекьерин гьерекатдин къайдаяр ва машинар авай чкада аялриз чеб хатасуздаказ тухуз чирдай центрадиз 5 йисалай виниз яшар хьанвайбур кьабулда. Ам Россиядин автостраховщикрин Союзди ГИББД-дихъ галаз санал 2017-йисалай инихъ уьмуьрдиз кечирмишзавай Вирироссиядин проектдин сергьятра аваз арадал гъанва. Проектдин макьсад аялринни жаванрин иштираквал аваз жезвай аварийрин кьадар тIимиларун я. Къенин юкъуз ихьтин центраяр Россиядин 39 субъектда ачухнава, — алава хъувуна чешмеди.
ЦIийи центрада аялриз, теория хьиз, къугъунин къайдайрикай менфят къачуналди практикадани чирда. Идалайни гъейри, аялрин яшариз ( абур пуд категориядиз пайнава) килигна, гьар са категория патал (яшдин кьетIенвилер фикирда кьуналди) кьилдин программаяр туькIуьрнава. И карда рекьерин гьерекатдин хатасузвал таъминарунин, медицинадин, психологиядин ва педагогикадин хилерай уьлкведин машгьур экспертри иштиракнава.
Алай йисан алатнавай варцара Дагъустанда 16 йисал къведалди яшда авай аялрихъ галаз алакъалу 184 авария хьанва. Нетижада 13 аял — телеф ва 175-дални хирер-кьацIар хьана.
«Лезги газет»
