Ахцегь райондин сайтда хабар ганвайвал, и йикъара МР-да “Чкадин теклифрин тереф хуьн” госпрограмма уьмуьрдиз кечирмишунин сергьятра аваз Луткуна футболдин майдан туькIуьрунив эгечIнава. Ада 1300 квадратный метр кьада.
Тендердин нетижайрал асаслу яз, 5 миллионни 294 агъзур манатдин икьрар пудратчи организация тир “Спортдин академия” ООО-дихъ галаз кутIуннава.
И проект кьилиз акъудун патал 800 агъзур манат спонсорри ганва. Амай такьатар республикадин ва райондин муниципалитетдин бюджетрай чара ийида.
Райондин ва Луткунрин хуьруьн администрациядин кьиле авай ксари и проект уьмуьрдиз кечирмишун патал пул чара авунай хуьруьнвияр тир Жигерхан Сулеймановаз, Шагьпаз Жабраиловаз ва Эшреф Къличхановаз сагърай лугьузва.
«Лезги газет»
