1-декабрдиз Докъузпара райондин администрацияда кьиле фейи депутатрин Собранидин нубатдин сессиядин сергьятра аваз Мегьамед Арсенович Шамилов муниципалитетдин кьилин везифаяр вахтуналди тамамарзавайди яз хкяна. Къейд ийин хьи, икьван чIавалди райондин кьилин къуллугъдал Агьмед Агьмедов алай. Ам хушуналди и къуллугъдилай элячIна.
М.А.Шамилов 1986-йисуз Усугъчайдал дидедиз хьана. Адан буба Арсен Шамилова Советрин девирда партиядин органра, гуьгъуьнлай Докъузпара райондин администрацияда кIвалахна. Адакай РД-дин Халкьдин Собранидин депутатни хьанай.
Мегьамед Шамилова “Государственное и муниципальное управление” пешекарвиляй дуьньядин экономикадин институт акьалтIарна.
Докъузпара райондин хуьруьн майишатдин управленида кассир-счетовод, искусствойрин школада муаллим яз кIвалахна. Гуьгъуьнлай Усугъчайдин администрациядин кьилин заместителдин везифаяр тамамарна.
2020-йисан 30-ноябрдиз Докъузпара райондин кьилин везифаяр вахтуналди тамамарзавайдан заместитель яз тайинарна.
Эвленмиш хьанва, 2 аялдиз тербия гузва.
«Лезги газет»
