11-ноябрдиз кьабулай къарардин бинедаллаз, Дагъустандин Кьилин везифаяр вахтуналди тамамарзавай Сергей Меликова республикада чилерин участокар ишлемишуниз талукь кIвалахдин нетижалувал артухарунал машгъул жедай комиссия тешкилун тапшурмишна. Идакай “Дагъустан” РИА-дин майдандал журналистрихъ галаз гьа и юкъуз хьайи гуьруьшдал РД-дин чилерин ва эменнидин алакъайрин министр Агъарагьим Къагьиргьажиева ва РД-дин юстициядин министр Къазимегьамед Сефикъурбанова хабар гана.
Малум хьайивал, комиссияди кIвалах кьиле тухудай вахтунда республикадин дережадин чилерихъ галаз алакъалу юридический вири гьерекатар акъвазарнаваз жеда. МасакIа лагьайтIа, 11-ноябрдилай башламишна, республикадин хсусиятда авай чилерин участокар маса гунал, кирида ва я замин яз вугунал, сад-масадахъ дегишарунал (ва икI мад) вахтуналди къадагъа эцигнава. И къарардин макьсад республикадин нетижалудаказ ишлемиш тийизвай ва я гадарнавай чилер винел акъудун ва абур майишатда ишлемишиз башламишун я.
“Им ревизия ваъ, чахъ авай чилерин участокар кьил-кьилеллаз ва къайгъударвилелди ишлемишунин месэладал фикир желб авуниз эвер гузвай тапшуругъ я. Чил авачиз, республикадин къурулушар (инфраструктура) виликди тухуникай рахун мумкин туш”, — тикрарна С.Меликован гафар А.Къагьиргьажиева.
РД-дин Минимуществодин, Россимуществодин, хуьруьн майишатдин ва недай суьрсетдин министерстводин, тIебиатдин ресурсрин ва экологиядин, гьакIни са жерге маса идарайрин векилрикай ибарат комиссиядин кIвалах 2021-йисан 15-февралдалди давам жеда.
Комиссиядин асул макьсад Дагъустандин чилер ишлемишунин хиле къайда туникай, эцигунрин хиле гьалтзавай месэлаяр гьялуникай, шегьердин мулкар, гьакIни хуьруьн майишатдин чилер кьил-кьилеллаз, хийирлудаказ ишлемишуникай ибарат я. ИкI, министрдин гафаралди, чилер ишлемишунин рекье гьалтзавай бязи месэлайри инвестицийрин проектар уьмуьрдиз кечирмишуниз ва эцигунрин кIвалахар гъиле кьун патал инвесторриз лазим чилер чара авуниз манийвалзава. И кар себеб яз, Дагъустанда заводар, яшайишдин ва туриствилин объектар, мектебар ва азарханаяр эцигун патал чилин участокар жагъурун четин месэладиз элкъвенва.
Чил ишлемишунин месэладив вири патарихъай ахтармишуналди эгечIунин къайда республикадин вири муниципалитетра кардик хьун лазим я. Талукь тир тапшуругъар абурув агакьарнава.
“И кIвалахдин сергьятра аваз чилерин кирида къачуниз талукь вири икьрарриз цIийи кьилелай, абурун алай вахтунда къуватда авай кадастрдин къиметдал бинеламиш яз, килиг хъийида. И рекье кIвалах кьиле тухузва ва, алай вахтунда, арендаторрив хабардарзавай чарар агакьарнава”, — лагьана А.Къагьиргьажиева. Ада гъавурда турвал, кирида къачунвай чилер ишлемишунин нетижалувал ахтармишун патал арендаторривай мукьвал тир 5 йисан планар истемишда ва абур гьи гьалда аватIа, тайин макьсаддихъ элкъуьрна ишлемишзаватIа килигда.
Инал къейд авун важиблу я: кардик кутунвай сергьятвилер федеральный ва кьилдин ксарин хсусиятда авай чилериз талукь туш.
Арадал къвезвай суалриз тамамдаказ жавабар гун, месэладин гъавурда тун патал “кузвай линиядин” нумра кардик кутунва: (8722)-666-999 (пакаман сятдин 9-далай нянин сятдин 6-далди, гьяд — ял ядай югъ). Месэладиз талукь тамам делилар гьакIни РД-дин МФЦ-дин ва РД-дин чилеринни эменнидин алакъайрин министерстводин сайтрай жагъида.
Жасмина Саидова
