RosTender.info. сайтди хабар гузвайвал, “Государственный заповедник “Дагестанский” ФГБУ-дин тIалабуналди пешекарри “Самурский” милли паркуна ахтармишунар кьиле тухуда.

РикIел хкин, республикадин кьиблепата милли парк алатай йисан эхирра арадал гъанай. Адак Самурдин тамун мулкар акатзава. Пешекарри 8 гектардин майданра ахтармишунар кьиле тухуда. Кьилди къачуртIа, тарар авай гьалдиз килигна, абур кьурунин себебар тайинарда, тамун мулкара санитариядин жигьетдай авай гьалариз къимет гуда ва маса серенжемар кьабулда.

И кIвалахар кьиле тухун патал тендер малумарнава. 14-ноябрдиз и месэладиз талукь гьерекатрин нетижаяр кьуна. Тендерда гъалиб хьайи карханадихъ галаз саки 8 миллион манатдин кьадарда аваз икьрар кутIунна. Ахтармишунар кьиле тухун патал такьатар федеральный бюджетдай чара ийида.

«Лезги газет»