17-ноябрдиз Мегьарамдхуьруьн райондиз Урусатдин эцигунрин ва ЖКХ-дин министрдин заместитель Дмитрий Волков ва РД-дин Гьукуматдин Председателдин заместитель Инсаф Хайруллин мугьман хьана. Идакай “Лезги газетдиз” муниципалитетдин администрациядин пресс-къуллугъди хабар гана.
Кьилди къачуртIа, мугьманар Самур хуьре хкажзавай мектебдин дараматдин эцигунрин кIвалахрихъ галаз таниш хьана. ЦIийи мектебда кIелдай 504 чка жеда. Проектдал асаслу яз, эцигунрин кIвалахар алай йисан эхирдалди акьалтIарун лазим я.
Эцигунрал машгъул жезвай пудратчи карханадин — “Стройхолдинг” ООО-дин векил Мурад Мамедова объектдал кьиле тухванвай кIвалахрикай суьгьбетна. Дарамат пуд мертебадинди ва ам пуд корпусдикай ибарат я.
Дмитрий Волкова объектдал кьиле тухванвай кIвалахрилай вичин разивал къалурна.
«Лезги газет»
