Сурарай ахкъудзава
Тестикь тахьанвай Дагълух Къарабах республикадин гуьзчивилик хьайи Карвачардин (Кельбаджар) агьалийри-эрменийри чпин багърияр кучукнавай сурар эгъуьнна, анрай абурун амукьаяр ахкъудиз гатIуннава. Гила Азербайжандив вахкузвай чкада абуруз чпин багърийрин сурарни амукьна кIанзавач. Идакай “Sputnik Армения” чешмеди хабар гана.
“Пака маса ксар атайла, абуру сурариз, памятникриз вуч ийидатIа, чаз чизвач”, — чпи ийизвай кардин себеб раижна са агьалиди.
Идалай вилик хабар гайивал, Карвачара шегьердин агьалийри чеб яшамиш жезвай мулкар Азербайжандин гуьзчивилик акатдайдакай малумарайдалай кьулухъ чпин кIвалериз цIай ягъиз эгечIна.
Арза кьабулнач
Пенсильваниядин вини дережадин судди США-дин исятда авай президент Д.Трампан штабдин арза кьабулнач. Арзада, Филадельфия шегьерда сечкийрин нетижаяр кьадайла, гуьзчивалдайбурун мумкинвилерал сергьят эцигайди къейднава. Идакай “Новости” РИА-ди хабар гана.
Суддин фикирдалди, кандидатрин векилриз сечкийрин комиссияди вичин кIвалах кьиле тухузвай къайдадал гуьзчивал тухудай мумкинвал гана.
7-ноябрдиз Демократиядин партиядин патай кандидат Байдена вич США-дин цIийиз хкянавай президент тирди малумарна. Трампа са жерге штатра вичин кIвенкIвечивал суддин куьмекдалди тестикьаруник умуд кутунва.
Коронавирус
18-ноябрдин делилралди, дуьньяда коронавирус акатайбурун кьадар 55 961 196-дав агакьнава. 38 882 176 кас сагъар хъувуна, 1 344 102 кас — кьена.
Россияда цIийиз коронавирус акатзавайбурун кьадар эхиримжи йикъара къвердавай артух жезва. Эхиримжи са шумуд юкъуз коронавирус акатайбурун кьадар 22 агъзурдалайни алатнава. 18-ноябрдин делилралди, чи уьлкведа 1 971 013 кас коронавирус себеб яз начагъ хьана, 1 475 904 кас сагъар хъувуна, 33 931 кас кьена. И делилар “Coronavirus-monitor.ru” сайтди раижна.
ЭкъечIда
Евразиядин гьукуматрин Ассоциациядин кьил Х.Женгиза “Лента.ру” чешмедиз малумарайвал, мукьвара Туьркия НАТО-дай экъечIда. “Мукьвал вахтара НАТО чкIида, амадагриз хатасузвал таъминариз тежезвайди абуруз чпизни чизва”, — лагьана Женгиза.
Адан фикирдалди, мукьвал тир 2-3 йисан къене НАТО чукIун ва Россияди стратегиядин цIийи пакт арадал гъун мумкин я, гьаник Туьркияни акечIда.
Санкцияр гегьеншарда
Белоруссияди Канададиз ва Евросоюздин гьар са уьлкведиз талукь яз санкцийрин сиягь гегьеншарда. Идакай “Интерфакс-Запад” чешмеди хабар гузва.
6-ноябрдиз ЕС-ди Белоруссиядин са жерге официальный ксариз, гьа жергедай яз президент А. Лукашенкодизни акси яз санкцияр кардик кутунай. Европади президентдин сечкийрин вилик ва абурулай кьулухъ хьайи репрессийрин патахъай жаваб гудай кас уьлкведин регьбер яз гьисабзава. Минскда эглешарай Р.Бондаренко кьейидалай кьулухъ, 13-ноябрдиз, Евросоюзди алава санкциярни кардик кухтаз гьазур тирдакай малумарнай.
Белоруссияда гегьенш къатарин иштираквал авай наразивилер 9-августдиз президентдин сечкияр кьиле фейидалай кьулухъ арадал атана.
25 агъзур цицIиб тергда
Уьлкведа садлагьана къушарин грипп пайда хьунихъ галаз алакъалу яз, Даниядин гьукумдарар къушарин фермада 25 агъзур цицIиб тергдай фикирдал атана. Идакай “Ekstra Bladet” чешмеди хабар гузва.
Къейдзавайвал, къушарин грипп инсанрик акатнавай дуьшуьшар малум туш. Гьукумдарри къушарин як маса уьлквейриз ракъурунин кардал агъа кIан пуд вацра къадагъа эцигнава.
Сирияда мад ягъунар
Израилдин яракьлу кьушунри авиациядин гьужум авуникди Сириядин пуд военный кьена, садал хирер хьана. Идакай “SANA” агентстводи хабар гузва. Чешмедин делилралди, Сириядин ПВО-дин куьмекдалди са ракета виликамаз кьуна. Израилдин армияди ракетадай ягъай делил Twitter-да тестикьарна.
Кьушунар ахкъудда
США-дин оборонадин министрдин везифаяр тамамарзавай К.Миллера малумарайвал, 15-январдалди Афгъанистандани Иракда чпин военныйрин кьадар 2,5 агъзурдав агакьна тIимил жеда. “Al Jazeera” чешмедин делилралди, ихьтин къарардал президент Д.Трампа къул чIугунва.
Июлдиз госсекретарь М.Помпеоди США-диз 2021-йисан майдалди Афгъанистандин мулкарай чпин кьушунар тамамвилелди ахкъудиз кIанзавайдакай хабар ганай.
«Лезги газет»
