Лезги эдебиятдин “Самур” журналдин вад лагьай нумра чапдай акъатна. Гьар гъилера хьиз, и сефердани журналда гьикаятдин ва шииратдин таъсирлу эсерар гьатнава. Дагъустандин халкьдин писатель Абдуселима Исмаилова вичин сифте гафуна бязи уьлквейрин пачагьрилай гатIунна, чи депутатрал, гъвечIи чиновникрал агакьдалди гьикI абуру чпин къанлу, инсаниятдиз, уьлквейриз, жемиятдиз зиянлу гьерекатриз, крариз рехъ гузватIа къейднава. “Тапуни таб хазва”, — лугьузва писателди. Таб ийизвайбуруз и кардикай регъуьни хъжезмач. Гьайиф къведай кар ам я хьи, тапарралди чпин кьил хуьзвайбур гзаф жезва.
А.Исмаилован “Рекьин къейдер — рикIин гьиссер” рубрикадик кваз ганвай куьруь, хъуьтуьл чIалалди кхьенвай эсерарни регьятдиз, са нефесдал кIелиз жедайбур я. Эсеррин игит сад я — Абусид. Адан уьмуьрдин гьар са легьзе таъсирдайди я.
Гьикаятдин эсеррикай журналда писатель Нариман Ибрагьимован “Кьисметдин къекъуьнрал” романди еке чка кьунва. Адан сад лагьай пай “Ватандиз рехъ” тIвар алаз 2017-йисан 3-4-нумрайриз акъатнай.
“РикI — накьварал, руьгь цаварал ашукь я” кьил алаз ганвай Зульфикъар Къафланован цIийи шииррин циклда авторди вичиз хас жуьреда инсандин уьмуьрдиз, дуьньядин гьалариз талукь гьерекатар, гьиссер, фадлай тестикь хьанвай эбеди крар, (кIанивал, уьмуьр, ажал, югъ, йиф, дуствал, хаинвал, женг) къалурзава.
Лезги шииратда фадлай чпин халичадин чешнеяр хразвай Рима Гьажимурадовадин ва Айна Шалбузовадин журналда ганвай эсеррин зерифвал, мегьрибанвал ва гьа са вахтунда ватанпересвал, уьтквемвал гьасятда кьатIуз жезва.
Шаир ва муаллим Аллагьяр Абдулгьалимова 250 йисан юбилейдихъ галаз алакъалу яз Мирзе Алидин уьмуьрдай мичегьви сухта Къадирахъ галаз хьайи алакъаяр рикIел хкизва.
Журналист, писатель, таржумачи Гьажи Ильясова вичин къелем драматургиядани ахтармишзава. Адан “Хъуьруьн къведай агьвалат” (чи йикъарин къемеда) кIелиз хуш къведай эсер хьанва.
Абад Азадов
