Играми ватанэгьлияр!
«Лезги газетдин» редакцияди, алукьзавай 2021-йис патал хайи газет кхьинин сергьятра аваз, «Лезги газет» — гьар са кIвализ» тIвар алай серенжем кьиле тухузва. Адан макьсад мумкинвилер авай лезги стхайри, вахари чпин хсуси такьатрихъ чи хуьрера, районра, шегьерра яшамиш жезвай мукьва-кьилийриз, миресриз, ярар-дустариз, са акьван агьваллу тушир лезги хизанриз, мергьяматлувилин лишан яз, алукьзавай йис патал «Лезги газет» кхьиникай ибарат я.
«Лезги газет» чи халкьдин милли дестек я. Алай йисуз адан 100 йисни тамам хьанва. Газетдиз лезгийрин тарихдиз, медениятдиз, эдебиятдиз, Ислам диндиз, жемиятдиз, сиясатдиз, марифатдиз, спортдиз ва маса месэлайриз талукь макъалаяр, эсерар акъатзава. Лезги чIал хуьнин, ам вилик тухунин жигьетдайни газетди еке кIвалах кьиле тухузва. Им лагьай гаф я хьи, «Лезги газет» чи миллетдиз руьгьдин ем гузвай суфрадиз элкъвенва. Амма, гьайиф хьи, мумкинвилер авачир гзаф лезгийривай а суфрадихъ ацукьиз жезвач. Яни, дарда авай лезги хизанривай, пул гана, газет кхьиз жезвач. Гьавиляй мумкинвилер авай ватанэгьлийри чпин такьатрихъ абуруз газетар кхьейтIа, сувабдин кар жеда.
«Лезги газет» почтадин отделенийрай (йис патал – 977 манат), «Дагпечатдин» киоскрай (йис патал – 456 манат) кхьиз жеда. Эгер квехъ почтадин отделенийриз, киоскриз фидай мумкинвал авачтIа, телефондин и нумрадиз (8-928-584-16-72) зенг авуна, чи редакциядихъ галаз алакъадиз экъечI. Чна квез газетар кхьинин карда куьмек гуда.
Играми стхаярни вахар, ша чун чи чIал, дин, тарих хуьнин, вилик тухунин рекье сад жен. «Лезги газет» — гьар са кIвализ» серенжемдивай яргъа жемир, куь пайни кутур!
Мегьамед Ибрагьимов, «Лезги газетдин» кьилин редактор
