Чи ватанэгьлияр — гьар сана
Дуьньядин тIвар-ван авай ксарин уьмуьрдин рекьериз фикир гайитIа, агалкьунрин кукIушрив агакьун патал инсанди хкянавай пешедин рекьяй датIана виликди еримишун лазим жезва. Вичикай ихтилат физвай Эльвира Низамиевна Алиевани (Девришбегова) илимрин докторвилин, профессорвилин чIехи дережайрив агакьнавай алим я.
Э.Алиева 1973-йисуз Дербент шегьерда савадлу сихилрикай тир лезги хизанда дидедиз хьана. Къадим шегьердин 3-нумрадин юкьван мектеб акьалтIарна, 1989-1994-йисара Курганский областдин Шадринск шегьердин гьукуматдин педагогвилин институтдин къецепатан чIаларин факультетда (ингилис ва немс чIаларин муаллимдин пешедай) дерин чирвилер къачуна.
Вичин зегьметдин рехъ ада хъсандиз ингилис чIал чизвай муаллимрин жигьетдай еке игьтияж авай Дагъустанда башламишна. Махачкъаладин ДГТУ-да Эльвира Низамиевнади 1994-2004-йисара студентриз ингилис чIалан тарсар гана.
2004-йисуз Э.Алиевади филологиядин илимрин кандидатвилин, 2010-йисуз РАН-дин чIалар ахтармишдай илимдин институтда “Функционально-семантическая категория модальности и ее реализация в разноструктурных языках (русском, английском и лезгинском)” темадай филологиядин илимрин докторвилин диссертация хвена.
2004-йисалай 2013-йисалди ада Москвадин МИЭП-да (Международный институт экономики и права) са шумуд къуллугъдал кIвалахна: сифтедай кафедрадин заведующий, ахпа лингвистикадинни межкультурный коммуникацийрин факультетдин декан, гуьгъуьнлай институтдин проректор хьана. 2014-йисалай Москвадин МГППУ-дин ингилис чIалан кафедрадин профессор яз зегьмет чIугуна.
2015-йисалай Эльвира Низамиевнади “Эколабмедтест” ООО-дин (Волкован тIварунихъ галай клиникадин) генеральный директордин къуллугъдал кIвалахзава. Клиникада диетологиядин, аллергологиядин, иммунологиядин ва маса хилерай инсанрин сагъламвилиз къуллугъзава.
Алимрин, тIвар-ван авай пешекаррин хизандай тир Э. Алиевадин буба Сулейман-Стальский райондин Уллугъетягърин хуьряй, диде Кьасумхуьрелай я. Буба Низами Рамазанович Девришбегов — ДГТУ-дин кафедрадин профессор. Диде Муминат Мегьамеднабиевна Девришбеговади (Оружева) Дагъустандин здравоохраненидин министерствода кIвалахна. ЧIехи вах Сабина Низамиевна Ханбалаева филологиядин илимрин доктор я, МГИМО-дин международный журналистикадин ингилис чIалан факультетдин студентриз тарсар гузва.
Филологиядин илимрин кандидатвилин тIвар къачунвай гъвечIи вах Алина Низамиевна Девришбегова чи уьлкведин меркезда карчивилел машгъул я.
Ингье лезгийрин анжах са хизандай са шумуд алим акъатнава. Чешнелу ватанэгьлийрихъ къуй гележегда мадни еке агалкьунар хьурай!
К.Ферзалиев
