“Лезги газетдин” алай йисан 44-нумрадай чна Хив райондин АрхитIрин хуьре ЧIехи Гъалибвилин 75 йисан гьуьрметдай Кьиблепатан Дагъустанда вичиз мад тешпигь авачир, 18 метрдин кьакьанвал авай надир имарат — мемориалдин комплекс хкажнавайдакай хабар ганай. РикIел хкин, обелиск эцигун патал пулдин такьатар чара авурди архитIви кьегьал хва Альберт Мегьамедович Эмиргъаев я.
Мукьвара лезги чилел ЧIехи Гъалибвилин 75 йисан гьуьрметдай хкажнавай мад са имарат ахъайна — Сулейман-Стальский райондин ЦIийи Макьарин хуьре.
Мемориалдин “Гъам чIугвазвай диде” комплекс ачухуниз талукьарнавай мярекатда РД-дин милли сиясатдин ва динрин крарин рекьяй министр Энрик Муслимова, Сулейман-Стальский райондин кьил Нариман Абдулмуталибова, Дагъустандин Халкьдин Собранидин депутат Гьамидулагь Мегьамедова, муниципалитетдин администрациядин, жемиятдин, яратмишдай интеллигенциядин векилри иштиракна.
Лагьана кIанда, комплекс эцигун патал чкадин бюджетдин ва бюджетдинбур тушир фондарин такьатар желбнавай. Гъам чIугвазвай дидедин гуьмбетдиз акъатай харжар (2 миллиондилай виниз) карчи, меценат, “Фирма “Тефи” ООО-дин учредитель Тельман Гьамзаева вичин хивез къачуна. Гуьмбет лагьайтIа, Урусатдин лайихлу художник Шариф Шагьмарданова туькIуьрна. “Шегьердин къулай шартIар арадал гъун” проектдин сергьятра аваз мемориалдин вилик махсус майдан гьазурнава, экв тухванва ва “Мидаим цIун” къурулуш кардик кутунва. Кьуд пад элкъвена кул-кусар цана аваданлу авунва.
Мемориалдин комплексдин кьулунал Ватандин ЧIехи дяведин иштиракчийрин тIварар кхьенва. Абурун арада ЯркIи дередин хуьрерин — Рухунрин, Ичинрин, Куркурхуьруьн, Татарханхуьруьн, Мехкергърин ва Агъа Макьарин — агьалияр ава. И хуьрерай дяведиз, санлай къачурла, 361 кас фенай, абурукай 225-даз элкъвена хайи Ватандиз хтун кьисмет хьанач. 60-йисара ЯркIи дередин хуьрерин агьалияр арандиз куьч хьана ва ЦIийи Макьар хуьр арадал гъана.
Комплекс ачухуниз талукьарнавай мярекатдал Нариман Абдулмуталибова имарат арадал гъуник пай кутур гьар садаз сагърай лагьана ва чIехи бубайрин экуь къамат, кьегьалвилер рикIера хуьнин, жегьилар ватанпересар яз тербияламишунин жигьетдай монументдихъ авай важиблувал къейдна:
— Гьуьрметлу агьалияр, за квез виридаз и шад вакъиа рикIин сидкьидай мубаракзава. ЦIийи мемориал райондин мулкарал алай надир имаратрикай садаз элкъвенва. Ам эцигунин макьсад дяведин йисара чанар къурбанд авурбурун къамат рикIера хуьнал сергьятламиш жезвач. Монумент гьакIни къати женгера чпин веледрикай магьрум хьайи дидейрин, вири дишегьлийрин кьегьалвилин вилик ийизвай икрам хьизни кьабулиз жеда. Тарихдин вилик ЧIехи Гъалибвилик пай кутурбурун лайихлувилер зурбабур я. Абурун кьегьалвилер рикIелай алуд тавун, Ватан хвейи рухвайринни рушарин тIварар эбеди авун чи умуми везифа я, — къейдна райондин кьили.
Мярекатдин сергьятра аваз иштиракчийрин вилик Энрик Муслимов, Гьамидулагь Мегьамедов, ЦIийи Макьарин администрациядин кьил Асамудин Къазиагьмедов, скульптор Шариф Шагьмарданов, Тельман Гьамзаев, отставкада авай полковник Магьсуб Магьмудов, мектебда кIелзавай аялар рахана. Абуру Ватандин ЧIехи дяведа чи ватанэгьлийри къалурай викIегьвилер рикIел хкана, обелискрихъ абур рикIера хуьнин жигьетдай авай метлеб къейдна.
“Гъам чIугвазвай диде” комплекс арадал гъунин карда еке зегьметар чIугур Тельман Гьамзаевав “Сулейман-Стальский райондин вилик лайихлувилерай” знак ва Шариф Шагьмардановав Гьуьрметдин грамота вахкана. Ш.Шагьмарданов гьакIни РД-дин милли сиясатдин ва динрин крарин рекьяй министерстводин гьуьрметдин знакдиз лайихлу хьана. Мярекатдин сергьятра аваз Энрик Муслимова республикада миллетрин арада авай дуствал мягькемаруник кьетIен пай кутунай Сулейман-Стальский райондин администрациядин кьилин пешекар Сефият Тагьировадив, лезги чIалан муаллим Заира Селягьовадив ва волонтер, 11-классдин ученик Рамазан Рагьимхановав гьуьрметдин грамотаяр вахкана.
Мярекат райондин культурадин отделдин векилри ва ЦIийи Макьарин мектебда кIелзавай аялри гьазурай концертдалди акьалтI хьана.
Агьмед Магьмудов
