Дагъустанда государстводин ва хсуси аптекаяр бес кьадар дарманралди таъминвал ва абурун къиметар кьетIен гуьзчивилик кутадайвал я. Герек хьайитIа, и кардал прокуратурадин органарни желб ийида. Идакай мукьвара Махачкъалада кьиле фейи заседанидал РД-дин Гьукуматдин Председатель Артем Здунова хабар гана.
“Вахтунда серенжемар кьабулун патал чахъ и жигьетдай тамам тир, гьакъикъатдив кьазвай малуматар хьун герек я. Эгер са ни ятIани, са бинени авачиз дарманрин къиметар хкажайтIа, прокуратурадин органар желб ийида. Алай вахтунда республикада раб-дармандин къиметар хкаждай са бинени авач. Дагъустан дарманралди бес кьадар таъмин я. И кардал инлай кьулухъни датIана гуьзчивал тухуда”, — къейдна Артем Здунова.
Мукьвара региондин здравоохраненидин министерстводи кьиле тухвай ахтармишунрин нетижада малум хьайивал, государстводин аптекайра къиметар хкажнавай дуьшуьшар жагъанач. Гьа са вахтунда Махачкъала, Дербент, Каспийск, Дагъустандин Огни шегьерра ва Къайтагъ районда авай бязи аптекайра са жерге дарманрин къиметар хкажнавайди тестикь хьана.
«Лезги газет»
