Гьеле октябрдин эвелра, Россиядин агропромышленный “Къизилдин зул — 2020” выставкадин сергьятра аваз, РФ-дин хуьруьн майишатдин министр Дмитрий Патрушева регионрин брендар тир недай суьрсетрин сад лагьай милли “Россиядин тIямар” конкурс башламишнавайдакай хабар ганай. Ада а чIавуз къейдайвал, уьлкведин гьар са регионда недай суьрсетрин хсуси брендар (продуктар) ава.
“Россиядин фермервилин суьрсет алай вахтунда къецепатан уьлквейрай гъизвайдалай гуьгъуьна авач, са кьадар терефрай ам гьатта вилик ква. Исятда чна ихьтин продуктар гьасилунин карда куьмек гунин, и кардик гьерекат кутунин программа гьазурзава”, — лагьана министрди.
Малум хьайивал, конкурсдин нетижаяр декабрдин вацра кьада. Идалай гуьгъуьниз регионрин брендар гегьенш майданра раиж авунихъ элкъуьрнавай программа кардик кутада.
Дагъустанди, конкурсда иштиракзавайбур яз, республика лишанламишзавай 6 продукт раижнава: лапагдин як, машмашрин миже, хипен ниси, кьурурнавай дулдурмаяр, чай ва кIепI (урбеч).
РД-дин хуьруьн майишатдин ва недай суьрсетдин министр Абзагьир Гьуьсейнова къейд авурвал, федеральный конкурсда иштиракуни чи брендриз суьрсет маса гудай цIийи базарар ачухдай, республикадиз агротуризмдин хиле авай мумкинвилер ишлемишдай ва гележегда хуьрерин чкаяр виликди тухудай рекьер ачухда.
“Чахъ Дагъустандин лапагдин як, Къизлярдин дуьгуь ава — ибур Кеферпатан Кавказдилай къерехда икьван чIавалдини машгьур продуктар я. Амма чахъ маса, гьелелиг чпикай са акьван хабар авачир суьрсетарни ава: кIепI, кьурурнавай дулдурмаяр ва маса шейэр. Абурни федеральный дережада машгьур авун патал куьмек гун герек я. Им республика патал хийирлу кар я…”, — къейдна А.Гьуьсейнова.
Алава хъийин, Вирироссиядин конкурсдин гъалибчияр муьжуьд рекьяй хкяда: “Вири уьлкве патал”, “Чи хуьряй”, “Дадлуди патав гва”, “Дад аку, рикI ацукьда”, “ТIямдин выставка”, “Чи къулан патав ша”, “Чун хкязава” ва “Сергьятар авачир дад”. Финалда иштиракун патал 22 продукт хкяда.
«Лезги газет»
