Къенин жегьил аямдарриз чидай эхиримжи йисарикай цIинин йис виридалайни алаш-булашди, нагьакьан, мурдар вакъиаярни мажараяр, гьерекатарни женгер, магьрумвилерни барбатIвилер кьиле фейиди хьана. Санлай дуьньядин гьалариз вил вегьейла, гьа ихьтин гьакъикъат ашкара жезва.
Дуьньяда тIугъвалди акIажарайбурун кьадар къе 46 миллиондилайни алатнава. РФ-дин здравоохраненидин министр М.Мурашкодин фикирдалди, коронавирусди россиявийрин уьмуьр дибдай дегишардач, амма ада тайин гел тада. Коронавирусдихъ галаз женг чIугунин карда хьанвай тежрибади хъсан нетижаяр арадал гъуник умуд кутазва. Идалай вилик Мурашкоди Россиядин гьалар 2021-йисан февралдиз адетдин къайдадиз хкведа лагьанай…
Коронавирус, СНГ-дин бязи уьлквейра арадал атанвай чалпачух гьалар, ягъунар, наразивилер, Франциядин регьберди мусурманрин намусдик хуькуьрун — ибур вири къе инсаниятдик велвела кутазвай “чешмеяр” я. Вири и крар тIимил хьайиди хьиз, Туьркияда мукьвара залзаладикни гзаф инсанар телеф хьана.
Дагълух Къарабах патал Азербайжандинни Эрменистандин арада кьиле физвай женгер акъвазардай “дарман” гьеле садавайни арадал гъиз хьанвач. “Дяведин эхир кьил меслят я”, — лугьузва чи халкьдин мисалда. Бес кьве патайни тIветIер хьиз рекьизвай жегьилрин патахъай ни ва гьикI жаваб гузвайди я?
Инал французрин амалрикайни гаф куд тавуна жедач. Мусурманрин алемди Франциядин регьбердин акьалтIай чIуру фикир меземмет ийизва. Кьилди къачуртIа, Ирандин газетда Э.Макронан къамат шейтIандин дунда аваз къалурна.
Госдумадин депутат Д.Свищева хъсандиз лагьана: “Дуьнья цIай акатунин хаталувилик ква. Вири дуьньядин цIайлах арадал атун патал кирбитдин са кьал кун бес я”. Ихьтин фикир депутатди Макроназ акси яз машгьур спортсмен Гьабиб Нурмегьамедова вичин инстаграмда къейд кхьейдалай кьулухъ раижна.
Гьелбетда, миллетрилайни динрилай аслу тушиз, инсанпересвал, ислягьвал кIани вирибуру Франциядин кьил тахсирлу ийизва. Гьихьтинди я дуьньяда гъулгъула тваз кIанзавай Макронан къаст? Лезгийрихъ “дуьнья хажалатдин кIвал я” лугьудай мисал ава. Аквазвайвал, гьа ихьтин ксар себеб яз, дуьнья хажалатдин кIвализ элкъвезва…
К.Ферзалиев
