Алатай гьафтеда Сулейман-Стальский районда цIийикIа туьхкIуьр хъувурдалай гуьгъуьниз Ватандин ЧIехи дяведин иштиракчияр рикIера хуьнин лишан яз эцигнавай обелискдин комплекс, Герейханован хуьруьн 1-отделенида ва Эминхуьре аялар къугъвадай майданарни галаз туькIуьрнавай паркарин зулар ачухуниз талукьарнавай шадвилин мярекатар кьиле фена.
Анра райондин кьил Нариман Абдулмуталибова, РД-дин Халкьдин Собранидин образованидин, илимдин, культурадин, жегьилрин крарай, спортдин ва туризмдин Комитетдин председателдин заместитель Гьамидулагь Мегьамедова, райадминистрациядин кьилин 1-заместитель Лацис Оружева, райондин общественный палатадин председатель Алимет Мейланова, образованидин управленидин начальник Гьуьсейн Шихбабаева, Дагъустандин писателрин Союздин лезги секциядин руководитель Владик Батманова, жавабдар маса ксари иштиракна.
Шадвилин мярекатар сятдин 11-даз ЦIийихуьруьн кIанихъ галай обелискдин комплекс ачухунилай башламишна. Анаг суварин къайдада безетмишнавай. Кьуд пад цуьквер, пайдахар тир. Обелискдин комплексдал хейлин кIвалахар кьиле тухванва: чиле плитаяр тунва, экв гудай фонарар, скамейкаяр эцигнава, комплекс элкъвена ракьун жугъунда тунва, къелемар, кул-кусар цанва.
Шадвилин мярекатдал тебрикдин келимаяр гваз Нариман Абдулмуталибов, Гьамидулагь Мегьамедов, райондин зегьметдин, дяведин, Яракьлу Къуватрин ветеранрин советдин председатель Ислеман Ризаев, ЦIийи поселокдин юкьван школадин директордин заместитель Надир Жинетханов рахана.
Гуьгъуьнлай райондин аялрин яратмишунрин кIвалин кьуьлердайбурун дестеди зиринг кьуьлер авуна, школада кIелзавайбур тир Ханум Агъамирзоевади, Сулейман Абдулмуталибова, Эмиля Шихбабаевади, Диана Велибеговади манияр лагьана, мярекат мадни гурлу авуна.
Герейханован хуьре аялар къугъвадай майданни галай парк ачухун Нариман Абдулмуталибова мубаракна, “Шегьердин къулай шартIар” проектдай районда общественный 12 чка эцигнавайдакай, къведай йисуз хуьрера мад 2 объект эциг хъийидайдакай, агьалийрин яшайиш хъсан хьун патал районда тухванвай ва тухун пландик кутунвай кIвалахрикай гегьенш рахунар авуна.
Концертдин программадилай гуьгъуьниз Нариман Абдулмуталибов, Гьамидулагь Мегьамедов, Алимет Мейланов ва жавабдар амай ксар цIийиз туькIуьр хъувунвай паркунихъ ва аялар къугъвадай майдандихъ галаз таниш хьана.
Эминхуьре Нариман Абдулмуталибов, Гьамидулагь Мегьамедов ва амай багьа мугьманар милли парталар алай школьникри фуни кьел гваз ва цуькверин кIунчIар вугуналди къаршиламишна.
— Лезги поэзиядин экуь чирагъ хьайи Етим Эминан тIвар алай хуьре эхиримжи вахтара хъсанвилихъ кьиле физвай дегишвилери чак шадвал кутазва, — лагьана Н. Абдулмуталибова. — ИкI, кьве йис вилик хуьре пуд мертебадин цIийи школа ачухна, гзаф куьчейра къир цанва. Къе хуьре аялар къугъвадай майданни галай паркунин гуьзел зул ачухзава. Зи фикирдалди, ругуд хуьруьн жемятар, са хизан хьиз, дуствилелди яшамиш жезвай Эминхуьруьз хъсан крар, цIийивилер, шад мярекатар хас я. За къенин лишанлу вакъиа эминхуьруьнвийриз мубаракзава.
Хуьруьн администрациядин кьил Сабир Юзбегова, Етим Эминан музейдин директор Гьайбатулагь Манатилова хуьре парк туькIуьрунай, хуьруьн месэлайриз фикир, куьмек гунай Нариман Абдулмуталибоваз чухсагъул лагьана.
Гуьгъуьнлай райондин культурадин дворецдин ва Эминхуьруьн культурадин кIвалин гьевескарри саналди тир чIехи концерт гана.
Идалай гуьгъуьниз Нариман Абдулмуталибова, Гьамидулагь Мегьамедова, Алимет Мейланова парк ачухунин лишан тир яру лент атIана. Багьа мугьманар, хуьруьнвияр паркуниз фена, ана сейр авуна. Н.Абдулмуталибова, Гь.Мегьамедова паркуна къелемар цана.
Хазран Кьасумов
