И йикъара лезги чIалан яратмишдай интеллигенциядин векилрив чIехи магьрумвал агакьна: 83 йисан яшда аваз, лап хъсан инсан, дустарал рикI хьайи дуст, шаир, духтур ва педагог Мегьедин Багьадинович Къардашев (Муграгъ Салахъ) рагьметдиз фена.
М.Б.Къардашев 1937-йисуз Докъузпара райондин Миграгърин хуьре дидедиз хьана. Ина юкьван школа, Махачкъалада медучилище, хуьруьн майишатдин институт (зооветеринариядин факультет) ва ДГУ-дин биологиядин факультет акьалтIарна. Жуьреба-жуьре идарайра жавабдар къуллугъар тамамарна.
КьетIен алакьунар ада хайи чIалан эсерар яратмишунани къалурна. Ада вичин хва — Дагъустандин халкьдин шаир Арбен Къардаш хьтин устад тер-бияламишна, адаз Москвадин Литинститутда кIелдай мумкинвал гана.
Вичин хсуси эсерар М.Къардашева геж майдандиз акъудна. Чи гъиле адан эсеррикай ибарат “Яб це билбилдиз”, “Таб галачиз”, “Дердер” ктабар, цIудралди шиирар, къейдер, мезелияр ама.
Чна рагьметлудан хизанриз, вири мукьва-кьилийриз башсагълугъвал гузва. Мегьедин Багьадиновичан экуь къамат чи рикIера эбеди сагъдиз амукьда.
“Лезги газетдин” редакциядин коллектив
