И йикъара Сулейман-Стальский райондин КIварчагърин хуьре 54 йисуз акьалтзавай несилдиз тарсар гайи муаллим, чIехи хизандин кьил Алибалаев Саржан Алибалаевич рагьметдиз фена.
С.А.Алибалаев 1935-йисуз КIварчагърин хуьре дидедиз хьана. 7-класс — КIварчагъа, 10-класс Миграгъа акьалтIарна. Табасаран райондин Пилигрин 7 йисан мектебда математикадин муаллимвиле кIвалахна. А вахтунда, Урусатдай атана, аялриз чирвилер ва тербия гузвай муаллим Зинаида Ивановнадихъ галаз кьисметар сад авуна. Абуру санал дагълух хуьрера акьалтзавай чи несилриз дерин чирвилер ва тербия гана.
Гзаф мектебра къекъвей, азиятарни дарвилер акур Саржан муаллимди вичин кIелунарни давамарна. Дагъустандин госуниверситетдин филологиядин факультет агалкьунралди куьтягьна.
1963-йисалай КIварчагъа школадин директорвиле, лезги ва урус чIаларинни литературайрин муаллимвиле кIвалахна. 2007-йисуз ам пенсиядиз экъечIна. Саржан муаллимдиз хуьруьнвийри ва дередин агьалийри еке гьуьрмет ийидай, чпивай гьялиз тежезвай месэлаяр гваз гьадан патав къведай. Гьуьрметлу хизанда 8 аял чIехи авуна, махсус чирвилер къачуз туна, дуьз уьмуьрдин рекьер къалурна.
Чна рагьметлудан хизанриз, вири мукьва-кьилийриз, багърийриз башсагълугъвал гузва. Саржан Алибалаевичан экуь къамат чи рикIера гьамишалугъ амукьда.
Виликан ученикрин ва санал кIвалахай дустарин десте
