Дагъустан Республикадин лайихлу духтур, райондин центральный больницадин тежрибалу хирург тир Мегьамедшериф Сулеймановичаз ва райадминистрациядин “МЦБ” МБУ-дин кьилин бухгалтервиле кIвалахзавай Селминат Мегьамедрасуловнадиз неинки Сулейман-Стальский районда, гьакI адалай къецени гьуьрмет ава. Къе чаз хизандин хъсан крар давамарунин рекье авай абурун руш Зейнабакай суьгьбет ийиз кIанзава.
Зейнаб 1999-йисан 12-апрелдиз дидедиз хьана. 2016-йисуз ада Кьасумхуьруьн 1-нумрадин юкьван школа къизилдин медаль къачуналди акьалтIарна. Гьа и йисуз Зейнаб Дагъустандин медуниверситетдик экечIна. Сифте курсунилай ам факультетдин староста я. КIелзавай 5 йисузни ада вири экзаменар ва зачетар лап хъсандиз вахкана.
ДГМУ-дин лап хъсан студентрин арада авай Зейнаб Гьасанбеговади и университетда, гьакIни университетрин арайра тухузвай олимпиадайра иштиракзава, анра кIвенкIвечи чкаяр кьазва. ИкI, ада 2019-йисуз ДГМУ-да фармакологиядай (“Scientia est potentia”) тухвай университетдин къенепатан олимпиадада 2-чка кьуна.
2019-йисан 2-3-декабрдиз Москвада инновацийриз рехъ ачухунин Фондуни “УМНИКИ” программадай тухвай “Московский молодежный старт-2019” конкурсда Зейнаб финалдиз акъатна.
Инновацийриз куьмек гунин Фондунин Генеральный директор С.Г.Полякован къул алай дипломдай малум жезвайвал, 2020-йисан апрелдин вацра Москвада “УМНИКИ” майдандал Зейнаб Мегьамедшерифовнадин проект 500 агъзур манатдин грантдиз лайихлу хьана.
Гила проект “Старт” майдандал ракъурун патал теклиф гьазурзава. Гуьгъуьнлай ДГМУ-дин лабораторияда илимдин рекьелди ахтармишунин кIвалах давамарун пландик ква.9-октябрдиз Зейнаб Гьасанбеговадин проект Дагъустан Республикадин Гьукуматдин Председатель Артем Здунован регьбервилик кваз Дагъустан Республикадин экономикадин ва мулкар вилик тухунин министерстводи тешкилнавай АСИ (агентство стратегических инициатив) форумдин “Сильные идеи для нового времени” региональный паюна иштиракун патал хкянава.
Форумдин эхиримжи пай федеральный дережада алай йисан ноябрдиз кьиле тухуда.
Зейнаб Гьасанбеговадиз ганвай сертификатрай малум жезвайвал, ада 2018-йисан 14-апрелдиз, Чечнядин госуниверситетдин 80 йисан юбилейдиз талукьарна, Грозный шегьерда нормальный физиологиядай вузрин арада тухвай олимпиадада, 2019-йисан 24-майдиз къецепатан уьлквейрай атай жегьил алимрин ва студентрин иштираквални аваз Махачкъалада тухвай мярекатда, 2019-йисан 6-7-июндиз Махачкъалада кьиле фейи Россиядин хирургрин обществодин выездной Пленумда, Дагъустандин хирургрин XIX съездда, 2020-йисан 30-31-январдиз ДГМУ-да химиядай тухвай вуздин студентрин 3-олимпиадада иштиракна.
2020-йисан 15-июндилай 21-июндалди “Территория инновационных идей, технологий и творческих решений” лишандик кваз тухвай Гатун виридуьньядин илимдин марафонда Зейнаб Мегьамедшерифовнади кхьей “Исследовательский проект “Разработка барьерных и биосовместимых нанопленок AI203 и TiO2 и применения на хирургических сетках” конкурсдин кIвалах 1-чкадиз лайихлу хьана.
Ихьтин руш тербияламишунай чна адан диде-бубадиз аферин лугьузва.
Вахъ кIелунра ва гъиле кьунвай илимдин кIвалахда мадни еке агалкьунар хьурай, чи бажарагълу руш Зейнаб!
Асият Мирзалиева,
Хазран Кьасумов
