ЧIехи Гъалибвилин 75 йисан юбилейдин йис эхирдиз къвезва, амма адаз талукь мярекатар давам жезва. ИкI, 22-октябрдиз Ахцегь райондин Мичегьрин хуьре баркаллувилин обелиск ачухна. И баркаллу кардив, кьиле ашукь Алихан аваз, хуьруьн са десте эгечIна. Пул­дин такьатар вири хуьруьнвийри кIватI­на. Мярекат суварин къайдада гурлудаказ кьиле фена.

Гуьмбет ачухунин митингдал Ахцегь райондин муниципалитетдин кьил Осман Абдулкеримован ва вичин патай тебрикдин гафар лугьуналди, адан заместитель Роберт Гьамзаев рахана. “…Мичегьрин са гъвечIи хуьряй 29 кас фронтдиз фин (абурукай анжах 10 кас хтана) — им еке ватанпересвал, кьегьалвал тир. Чи буржи абурун чешнейралди акьалтзавай несил ватанпересвилин руьгьдаллаз тербияламишун я. И кар патал гила хуьре кутугай чка хьанва”, — лагьана, ада ва хуьруьнвийрив райондин кьилин патай тебрикдин чар вахкана.

Ахцегь, Рутул, Докъузпара районрин уртах РВК-дин комиссар, подполковник Рафик Мегьамедова Ватандин ЧIехи дяведин йисара гъалибвилик районэгьлийри кутур лайихлу паюникай, дяведин иштиракчийриз чкайрал обелискар хкажунин метлебдикай итижлу суьгьбетна.

Гаф “сельсовет Смугульский” СП-дин (Мичегьрин хуьрни гьа и администрациядик акатзава) цIийиз хкянавай кьил Аслан Мегьдиева къачуна: — Гьуьрметлу мичегьвияр, мугьманар! Къадим Мичегьрин хуьре къе, ЧIехи Гъалибвилин 75 йисан юбилейдиз талукьарна, обелиск ачухзава. Ким, мис­кIин, пIир, кьегьалриз памятник ава­чир хуьр хуьр туш. Гила ина, туризмдин гъвечIи маканда, лайихлу са чка мад хьанва. Обелиск хьуникди хуьрел неинки абур атанва, дяведин залум йисара, чубандин чумахъ яракьралди эвезна, жегьил чанар гайи мичегьвияр гуя 75 йисалай багъри хуьруьз-кIвализ хтанва. Обелискдин къванцел чпин тIварар атIанвай рагьметлуйрин руьгьериз, хуьре абурун хизанризни мукьва-кьилийриз гьикьван хвеши ятIа, чна гьиссзава.

Ахпа мичегьвийриз тебрикдин хуш келимаяр райондин общественный палатадин председатель Али Исмаилова, райондин ветеранрин советдин председатель Нажмудин Гудаева, мичегьви муаллим ва шаир Аллагьяр Абдулгьалимова, Ашукь Османа, Ильман Исмаилова, Пери Рагьимхановади ва масабуруни лагьана. Шадвилинни пашманвилин гьиссер какахьай хуьруьн сувар ашукьри: стхаяр тир Алихан ва МутIалиб Мегьамедрагьимоври, чкадин бажарагълу кларнетчи Гьабди Вердиева, райондин культурадин кIвалин ашукьрин “Шарвили” ансамблди ва гьевескар артистри мадни гурлу авуна.

Дашдемир  Шерифалиев