Алай йисуз “Земский доктор” ва “Земский фельдшер” государстводин программадин сергьятра аваз республикадин районрин сагъар хъийидай ва азаррин вилик пад кьадай идарайра (ЛПУ), духтурвилин амбулаторийра ва фельдшервилинни акушервилин пунктра (ФАП) 102 духтур ва 4 фельдшер кIвалахдалди таъминарнава. Идан гьакъиндай “Лезги газетдиз” РД-дин здравоохраненидин министерстводин пресс-къуллугъди хабар гана.
“Республикада программа уьмуьрдиз кечирмишунин кIвалах давам жезва. Министерстводи чIехи ва юкьван звенодин мад са шумуд 10 медработник кIвалахдалди таъминарда. КIвалахдалди таъминарнавай пешекарри гьар сада са сеферда гузвай са миллион (духтурри) ва 500 агъзур (фельдшерри) манат къачуна. Четин шартIар авай хуьрерин пунктара кIвалахиз разивал гайи медикри талукь тирвал са сеферда гузвай гзаф кьадардин — 1,5 миллион ва 750 агъзур манат къачузва. Программадин шартIарал асаслу яз абур хуьре вад йисуз кIвалахуниз мажбур я”, — лугьузва малуматда.
РикIел хкин хьи, алай йисуз “Земский доктор” программадилай яшарин сергьятламишунар алуднава. Гила адан иштиракчияр 50 ва адалай гзаф яшар хьанвай пешекарарни жеда. Программа кардик квай вахтунда Дагъустанда 1400 медработник кIвалахдалди таъминарна. Алатай йисуз хуьре кIвалахун патал 234 пешекар рекье туна.
Программада иштиракиз кIанзавайбур патал лазим тир вири малуматар региондин здравоохраненидин министерстводин официальный “КIвалах” сайтда ава.
«Лезги газет»
