Алатай жуьмя юкъуз меркездин Дуствилин кIвале РД-дин милли политикадин ва динрин крарин рекьяй министерстводин ва Дагъустандин госуниверситетдин Дидед чIалар ахтармишдай центрадин къаюмвилик кваз чапдай акъуднавай цIийи ктабрихъ галаз танишарзавай ва министерстводи малумарнавай “Миллетрин арада ислягьвал ва меслятвал хуьнин ва Дагъустандин халкьарин этнокультура вилик тухунин месэлайрай” конкурсдин нетижаяр кьазвай мярекат кьиле фена.
Мярекат ачухуналди, РД-дин милли политикадин ва динрин крарин рекьяй министр Энрик Муслимова кIватI хьанвайбур тебрикна ва лагьана:
— Пуд йис идалай вилик Дагъустандин госуниверситетдихъ ва ана кардик квай Дидед чIалар ахтармишдай центрадихъ галаз санал гъиле кьур проектдихъ виле акьадай нетижаяр хьун шад жедай ва пара важиблу и кIвалах мадни давамардай ашкъи хкаждай месэла я,- лагьана Энрик Селимовича. — Заз малум тирвал, пуд йисуз дидед чIаларихъ, милли эдебиятдихъ, халкьдин фольклордихъ галаз алакъалу тир илимдин, литературоведенидин 16 ктаб чапдай акъудна. Им министерстводин патай хайи чIалал яратмишзавай, адахъ галаз кIвалахзавай ксариз чи патай са жуьредин куьмек я. Алай вахтунда дидед чIал хуьн лап кар алай месэладиз элкъвенва. Чи акьалтзавай жегьил несилдин чIехи пай шегьерра яшамиш жезва. Абур хайи халкьдин медениятдиз, эдебиятдиз мукьва авун, абуруз халкьдин фольклордин, манийрин ирс чирун, шииратдин, гьикаятдин эсеррал желб авун муаллимрин, алимрин ва яратмишзавай ксарин хиве гьатзава.
Дидед чIалар ахтармишдай центрадин директор Марина Гьасановади цIийи ктабар майдандиз акъудна: “Телесный код культуры в дагестанской паремиологической картине мира” (гьазурайбур — Марина Гьасанова ва Жалил Самедов), “Агульские сказки” (гьазурайбур — Салимат Гьасанова, Гьажи Алхасов, Луиза Бицимазаева), “Язык и поэтика Г.Омаровой в межкультурной коммуникации” (автор — Сабрина Шихалиева), “Очерки синтаксиса сложного предложения аварского языка” (автор — Жалил Самедов).
Мярекатдал ктабрин авторар рахана ва абуру милли медениятдин, эдебиятдин, чIалан гьакъиндай цIийи ктабрихъ авай метлебдикай, чпиз абур акъудиз куьмек гунай Энрик Муслимоваз сагърай лагьана.
Ахпа Энрик Муслимова винидихъ тIвар кьунвай конкурсда гъалибвал къазанмишай ва премийриз лайихлу хьайи республикадин милли газетрин журналистрив дипломар вахкана. Абурун арада “Лезги газетдин” сиясатдин отделдин редактор Нариман Ибрагьимовни авай.
Абад Азадов
