Дустагъдай катна
Конгодин Бени шегьердин дустагъдай тахминан 900 тахсиркар кьван катна. ИГ-дин (Россияда къадагъа авунвай тешкилат) боевикри центральный дустагъдал ва адахъ галай военный лагердал гьужумна. Къецепатан уьлквейрин чешмейрал асаслу яз, идакай “Лента.ру” сайтди хабар гузва.
Шегьердин кьилин фикирдалди, боевикри махсус тадаракдин куьмекдалди ракIаррин дапIарар хана. Нетижада дустагъда авай агъзурдалайни гзаф тахсиркаррикай ана амукьайди 100 кас кьван я.
Ихьтин агьвалат Конгода 2014-йисузни хьанай. А чIавуз Бутембо шегьерда авай дустагъдал боевикри гьужумуникди анай кар атIанвай 370 тахсиркардиз катдай мумкинвал хьанай.
Къаришмишвилин себеб
Туьркиядиз Дагълух Къарабахдин къалмакъалдихъ галаз алакъалу месэла военный къайдада гьялиз кIанзава. Идакай “France 24” телеканалдиз гайи интервьюда Эрменистандин президент А. Саркисяна малумарна.
Адан фикирдалди, Туьркиядиз Каспий гьуьлел алай энергетикадин рекьер гуьзчивилик кутаз кIанзава. Саркисяна гьисабзавайвал, женгерин гьаларик Россиядин патай къаришмиш хьунин чарасузвал авач. Саркисяна женгерин гьерекатар акъвазарун патал ЕС-дивай ва НАТО-дивай Туьркиядизни Азербайжандиз таъсир ийиз хьуник умуд кутазва.
Къарабахда къал, женгер алай йисан 27-сентябрдилай башламишна. 18-октябрдиз кьве терефни баришугъ гьалар малумарунин икьрардал атана, амма са тIимил чIавалай сада муькуьдак икьрар чIуруннай тахсир кутуна.
Хъиткьиндай смартфонар
“Интеллектуальный Резерв” тешкилатдин директор П.Мясоедова къейд авурвал, гзафни-гзаф “Samsung” тешкилатдин смартфонар хъиткьинзава. Идакай “Прайм” агентстводи хабар гана.
Инсанрин гъилера айфонар, айпадар хъиткьин хьайи дуьшуьшарни малум я. Ихьтин агьвалатар арадал татун патал гаджетдин батарея дуьздаказ ишлемишна кIанзава. Кьилди къачуртIа, ам ифир ва акIажар тавун, яргъалди зарядкадик тутун, чилел авуд тавун лазим я. Эгер телефондин аккумулятор дакIунвай гьалдиз атайтIа, ам тади гьалда цIийидалди эвезна кIанда.
Лукашенкодин жаваб
Белоруссиядин президент А.Лукашенкоди вичиз аксибуруз жаваб гана ва 25-октябрдиз Минскда къайда тун хиве кьуна. Малумарнавайвал, и юкъуз Белоруссиядин меркезда наразивал къалурунин нубатдин серенжемар кьиле фида. Идакай “ТАСС” чешмеди кхьизва.
Идалай вилик Белоруссиядин президентвиле кандидат хьайи С.Тихановскаяди, вичин теклифар кьилиз акъуд тавуртIа, кIеви серенжемар кьабулда лагьана, А.Лукашенкодивай кIеви истемишунар авуна. Кьилди къачуртIа, ада 25-октябрдалди А.Лукашенко къуллугъдилай элячIун ва сиясатдин месэлайрай дустагънавай вирибур азад хъувун лазим тирди малумарна. Тихановскаяди къейднавайвал, акси дуьшуьшда инсанар ислягьвилелди куьчейрал экъечIда, рекьер кIевда ва маса серенжемар кьилиз акъудда.
Кьил тIазвайла…
Испаниядин пегьризчийрин фикирдалди, кьил тIазвайла, инсанди нисидин бязи жуьреяр, цитрусар тIуьна виже къвезвач. Идакай пешекарри “La Vanguardia” чешмедиз раижна. Эгер инсандин кьил мукьвал-мукьвал тIа жез хьайитIа, пешекарри духтурдин патав фин теклифзава. Амма дегишвилер незвай затIариз, вердиш хьанвай къайдайризни талукьарна кIанда. Абуру аби рангунин ниси (абурук гистидиндин аминокислотаяр ква), цитрусар ва авокадо тIуьн тавун теклифзава. Ибурулайни гъейри, кьиле тIал гьатнавай вахтунда пешекарри яру чехир, гьакI ички квай маса затIарни ишлемиш тавун хъсан яз гьисабзава.
Душманар гьисабна
США-дин президент Д.Трампа сечкийрин вилик кьиле фейи митингдал вичин душманар вужар ятIа малумарна. Идакай “Новости” РИА-ди хабар гузва.
Вичиз акси Джо Байденалай гъейри, Трампа бязи СМИ-рихъ, технологиядин гигантрихъ галазни женг чIугвазва. Идалай вилик Трампа Байденан кIвалахдиз талукь яз ФБР-ди ахтармишунар тухун лазим тирди лагьанай.
США-да президентдин сечкияр 3-ноябрдиз кьиле фида.
Балугъчидин женг
Австралиядин Квинсленд штатдин агьалидин балугъар кьадай кIирерик крокодил акатна. Идакай “7news” чешмеди малумарзава.
Нубатдин сеферда гьуьлел фейила, балугъчидин кIирерик са зурба затI акатна. Сифтедай балугъчидиз вичин кIирер еке чукьвандихъ ва я маса затIунихъ галкIай хьиз хьана. Гуьгъуьнлай малум хьайивал, балугъчидин са кIир 2,5 метрдин яргъивал алай крокодилдин далудихъ галкIанвай. Къурхулувилизни килиг тавуна, австралиявиди гьайвандикай кIир хкуд хъувунин алахъунар авуна. Пуд декьикьада женг чIугурдалай кьулухъ кIир хкат хъувуна. Балугъчидиз зарар хьанач.
Идалай вилик Уганда уьлкведа крокодилди балугъчидин кIвачиз еке хасаратвал гайи дуьшуьшни малум я.
«Лезги газет»
