Дагъустандин зегьметдин ва яшайиш вилик финин министерстводин пресс-къуллугъдай хабар гайивал, са шумуд югъ идалай вилик Махачкъалада, “Дегишвилерин вахт” тIвар алай кафеда, гзафбуру фадлай вилив хуьзвай вакъиадиз талукьарнавай шад мярекат кьиле фена.
РД-дин Гьукуматдин Председателдин Сад лагьай заместитель Гьажимегьамед Гьуьсейнован, Дагъустандин зегьметдин ва яшайиш вилик финин министр Изумруд Муьгьуьтдиновадин, РД-дин эцигунрин ва ЖКХ-дин министр Малик Баглиеван ва масабурун иштираквал аваз кьиле фейи и мярекатдал I группадин инвалидрив ва инвалид аялар авай хизанрив яшайишдин шартIар хъсанарун патал субсидияр чара авунвай шагьадатнамаяр вахкана.
Малум тирвал, инвалидар патал махсусдаказ арадал гъанвай и программа кьилиз акъудунив регионда гьеле алатай йисуз эгечIнай. А чIавуз инвалидрив сертификатар вахкуниз 300 миллиондилай виниз пул чара авунай. ИкI, гуьгъуьнлай хьайи мумкинвиликай менфят къачуналди, и пулунин кьадар кьве сеферда артухарна. 2020-йисуз 500 хизандиз кIвалер маса къачудай мумкинвал жеда.
Чи мухбир
