РД-дин зегьметдин ва яшайиш вилик финин министерстводи алай йисан 16-ноябрдилай 16-декабрдалди “Зи гележег” лишандик кваз Вирироссиядин серенжем кьиле тухуникай хабар гузва. Ам 2016-йисалай инихъ кьиле тухузвай ва мектебра чIехи классра кIелзавай 700 000-далай виниз аялри иштиракзавай “Вирироссиядин профдиагностика” серенжем давамарун я.
“Зи гележег” серенжемдин иштиракчийри чпи хкязавай пешедиз талукь яз тестдиз жаваб гуда, гьакIни абурувай зегьметдин базарда къенин юкъуз истемишзавай пешейрикай малуматар, абуруз талукь яз зегьметдин базарда авай гьалар ва ам вилик тухунин мумкинвилер ва икI мад чириз жеда. Программадин сайтда (www.засобой.рф) и серенжемдикай мадни гегьеншдаказ малумат ганва.
Серенжемда чпин яшар 13-далай 17-далди тир жаванривай иштиракиз жеда. Ам пулсузди я. Ана иштиракиз кIанзавайбурувай чна винидихъни тIвар кьунвай www.засобой.рф сайтда арзаяр (къайда ана къалурнава) ацIуриз жеда.
Идалайни гъейри, и серенжемдин сергьятра аваз “ProfStories” (www.profstories.ru) проектни кардик кутунва. ИкI, тIвар-ван авай работодателри, жегьилриз пеше хкягъуниз куьмек гун яз, чпин тежрибадикайни лугьуда. Работодателрин куьмекдин нетижа яз, “ProfStories” проект мектебра кIелзавай аялар ва студентар патал къенин юкъуз гзаф герек пешейрихъ, зегьметдин шартIарихъ галаз таниш хьун патал кьетIен майдандиз элкъведа. Идани жегьилриз, Россиядин компанийра лазим къвезвай пешеяр хкягъуналди, чпин уьмуьр туькIуьриз, алай вахтунда девирди истемишзавай пешейрин сагьибар жез куьмекда.
“Зи гележег” серенжемда 8-октябрдилай башламишна иштиракиз жеда.
«Лезги газет»
