Вири алакьунрикай виридалайни четинди ва кьитдаказ гьалтдайди идара ийиз алакьун я
М. де Соммери
Зи макъала кар алакьдай бажарагълу инсан, Мегьарамдхуьруьн райондин агьалияр кIвалахдалди таъминардай центрадин (ЦЗН) регьбер Гьажиев Мавзидин Играмудиновичаз талукьди я.
М.Гьажиев 1976-йисан 24-мартдиз Мегьарамдхуьруьн райондин Къуйсундал гзаф аялар авай хизанда дидедиз хьана. Ина вири аялри неинки кьилин образование, гьакIни абуруз инсанвилин багьа ивирриз талукь яз виниз тир дережадин тербия къачуна.1982-йисуз М.Гьажиев хайи хуьруьн юкьван мектебдин 1-классдиз фена, 1993-йисуз ам агалкьунралди акьалтIарна, Даггоспедуниверситетдин физикадинни математикадин факультетдик экечIна. 1998-йисуз ада и вуздин юридический факультетдиз документар вугузва. 2001-йисуз анаг акьалтIарайла, адаз армиядин жергейриз эвер гана.
Зегьметдин рехъ М.И.Гьажиева 1999-йисуз “Кристалл” ЧП-дин директордин заместителвиле кIвалахунилай башламишна. И къуллугъдал ада 2002-йисалди кIвалахна. Ахпа ина юрисконсульт яз 2005-йисалди зегьмет чIугуна.
2006-йисуз Мавзидин Играмудиновичал “Дагэнерго” ОАО-дин Мегьарамдхуьруьн райондин электросетрин (РЭС) начальниквилин везифаяр ихтибарна. Гьина зегьмет чIугунатIани, ам гьамиша кIвалахдин рекьяй юлдашрив ва вичин гъилик кIвалахзавай ксарив рикIе къенивал, кардин гъавурда аваз эгечIна.
Мавзидин Играмудиновичахъ галаз зун мектебда кIелзавай йисарилай инихъ таниш я. А вахтарилай зи рикIел адан къенивал авай, хъвер алай чин алама. Чун мукьвал-мукьвал аквадай, райондин жуьреба-жуьре олимпиадайра гуьруьшмиш жезвай, за хьиз, гьадани анра еке ашкъидивди иштиракзавай ва кIвенкIвечи чкаяр кьазвай.
Къени инсан, хъсан регьбер хьиз, заз адан къилихдин ихьтин ерияр: чарадан дердиникай хабар кьун, жавабдарвал, зегьметдал рикI хьун, вичин принципрал кIевиз акъвазун, хъсан теклифар гуз, коллектив тупламишиз алакьун, датIана пешекарвал хкажуниз фикир гун къейд ийиз кIанзава. Адан патав меслят ва куьмек лазим яз вуж атайтIани, кIандатIа кIвалахдин рекьяй юлдаш хьуй, кIандатIа гьакI таниш са кас, гьа гьисабдай яз хуьруьнвийризни ам гьамиша вичелай алакьдай вири жуьредин куьмекар гуз гьазур я. Идан гьакъиндай ам 2015-йисалай 2020-йисалди Мегьарамдхуьруьн райондин собранидин депутатвиле хкягъуни шагьидвалзава. 13-сентябрдиз, сечкийрин сад тир юкъуз, Мегьарамдхуьре кьиле фейи и важиблу серенжемдин нетижадани адал хайи хуьруьн агьалийри и жавабдар везифа ихтибар хъувуна. Ам инлай кьулухъни райсобранидин депутат яз агьалийрин къуллугъда акъвазда.
Агьалияр кIвалахдалди таъминардай центрадин кьиле М.И.Гьажиев 2015-йисалай акъвазнава. Адан къайгъударвилин нетижада ина еке дегишвилер кьиле фенва. Чарадан дердиникай хабар кьадай, кIвалахдин гъавурда авай ксарикай ибарат тир хъсан коллектив арадал гъанва. Вири санлай ина 19 касди зегьмет чIугвазва.
Са шумуд гаф 2019-йисуз чи центради кьилиз акъуднавай кIвалахдикайни талгьана жедач. ИкI, 2019-йисан 1-январдиз Мегьарамдхуьруьн райондин ЦЗН-да кIвалахдик квачир 1212 агьали учётда акъвазнавай. Йисан къене, абурни кваз, санлай къачурла, 2738 кас кIвалахдалди таъминардай мумкинвал жагъурна. Абурукай райондин карханайра, организацийра ва идарайра 1161 касдиз кIвалах гана. ИкI, санлай къачурла, 2019-йисуз агьалияр кIвалахдалди таъминардай центради работодателриз теклиф авуналди ва кIвалахдик квачир, чеб винидихъ тIвар кьунвай центрада учётда акъвазнавай агьалийриз эвер гуналди вакансийрин 25 ярмарка кьиле тухвана.
Центради яшар тамам тахьанвай агьалияр, гьа гьисабдай яз кIелунрикай азад ва рухсатдин вахтундани, вахтуналди тир кIвалахдалди таъминаруниз талукь язни хейлин чалишмишвилер авунва. И жигьетдай чпин яшар 14 йисалай 18 йисалди тир 358 жегьил, яни яшар тамам тахьанвай ксар, кIвалахдалди таъминардай мумкинвал жагъуриз алакьна.
Центради 18-далай 20 йисалди яшара авай жегьилар вахтуналди тир кIвалахдалди таъминаруниз талукь яз кьиле тухузвай кIвалахдин нетижада алатай йисуз чпихъ пешекарвилин юкьван образование авай 15 кас кIвалахдалди таъминарна. Идалайни гъейри, кIвалахдик квачир, ЦЗН-да учётда акъвазнавай 102 жегьил юкьван пешекарвал къачун патал кIелиз рекье туна.
Мавзидин Играмудиновича общественный кIвалахар тешкилуниз ва абур кьиле тухунизни артух фикир гузва. Абуру неинки агьалияр вахтуналди тир кIвалахдалди таъминардай мумкинвал гузва, агьалийрин материальный гьал хъсанарзава, гьакIни район яшайишдин жигьетдай вилик тухунизни куьмекзава. ИкI, 2019-йисуз Мегьарамдхуьруьн районда общественный кIвалахар кьилиз акъудун патал карханайрихъ, тешкилатрихъ галаз бейкаррин жергедай тир 999 кас кIвалахдалди таъминарунин икьрарар кутIунна. Мадни 77 кас вахтуналди тир кIвалахдалди таъминарун патални райондин карханайрихъ галаз икьрар хьана.
Алай йисан апрелдилай “COVID-19” азардихъ галаз алакъалу яз малумарай карантиндин шартIара Мегьарамдхуьруьн ЦЗН-ди арзаяр “Госкъуллугърин” сад тир порталдин куьмекдалди кьабулзавай. ИкI, карантиндин варцара юкьван гьисабдалди 1557 арза кьабулна.
Яргъал йисарин гьакъисагъ зегьметдай, къуллугъдин везифаяр чешнелудаказ кьилиз акъудунай са шумудра М.И.Гьажиеваз РД-дин зегьметдин ва яшайиш вилик финин министерстводин, Мегьарамдхуьруьн райондин депутатрин собранидин гьуьрметдин грамотаяр гана. 2015-йисуз адаз РФ-да миллетрин арада ислягьвал, меслятвал мягькемарунин кардик лайихлу пай кутунай РФ-дин ГД-дин миллетрин крарин рекьяй Комитетдин Председатель Гь.К.Сафаралиеван патай, 2016-йисузни районда агьалийриз яргъал йисара гьакъисагъвилелди къуллугъ авунай Мегьарамдхуьруьн райондин кьил Ф.Агьмедован тIварунихъай чухсагъул малумарна.
Мавзидин Играмудинович неинки хъсан инсан, регьбер, гьакIни вичин кьве велед патал лап хъсан бубани я. Аяларни ада чарадан дердиникай хабар кьадайбур, къенибур, жавабдарбур, хъсан чирвилер авайбур яз чIехи ийизва, дуьзгуьн тербия гузва.
М.Гьажиева вичин намуслу зегьметдалди ва пешекарвилин устадвилелди кIвалахдин рекьяй юлдашрин патай еке гьуьрмет къазанмишнава. Заз адахъ чандин сагъвал, кIвалахда мадни еке агалкьунар, еке гьевеслувал хьана кIанзава.
З.Бабаева,
Мегьарамдхуьруьн райондин
ОУ-дин методкабинетдин методист
