И мукьвара Хуьруьгрин хуьре край чирдай музей ачухна. Кьиле фейи серенжемра иштиракун патал Хуьруьгиз райадминистрациядин ва маса идарайрин векилар мугьман хьанвай.
Музей ачухунин мярекат, тебрикдин куьруь гаф рахуналди, Хуьруьгрин мектебдин директордин везифаяр вахтуналди тамамарзавай тарихдин илимрин кандидат, РД-дин лайихлу муаллим Мамед Агьмедова ачухна ва кьилени тухвана. Ада къейдайвал хуьруьн тарихдин музей ачухун патал виликан туьквендин дарамат капитальнидаказ ремонтна. Ахцегь райондин кьил О.Абдулкеримова и рекьяй гайи теклифдин тереф хуьналди, хуьруьгвияр тир Зуьгьре Ширинбеговади, Сейфедин Абдулкеримова, Нурмегьамед Газалиева, Гьуьруьзат Къурбановади, Ражаб Рамазанова, Багьар Велихановади ва масабуру са куьруь вахтунда музейда эцигун патал хейлин экспонатар кIватIна.
Исятда цIийиз ачухнавай Хуьруьгрин музейда къадим замандин гъилин шейэр, парталар, къаб-къажах, яшайишдин, музыкадин, зегьметдин алатар, тIвар-ван авай хуьруьгвийрин портретар ва гзаф маса шейэр ава.
И мярекатдал гьакI райадминистрациядин физкультурадин, спортдин ва туризмдин месэлайрай кьилин пешекар Назиля Исмаилова, райондин край чирдай музейдин директор Агьмед Дагъларов, райондин образованидин управленидин кьилин пешекар Мейрам Рамазанова, “Краевед” тIвар алай журналдин отделдин заведующий, РД-дин лайихлу муаллим Гьасан Мегьамедов, педогогвилин зегьметдин ветеранар Селимбег Хаирбегов, Усман Урдуханов, Бейдуллагь Исмаилов рахана.
Ахпа инал Хуьруьгрин школадин ученикар тир Малик Нуралиева, Амина Акимовади, Гьалимат Ражабовади, Гелин Гьажимурадовади шиирар кIелна. Мярекатдин иштиракчияр музейда авай экспонатризни килигна.
Рагьидин Эминов
