Январдин эхирра Ахцегь райондин Общественный Палатадин гегьенш заседание хьана. Адан кIвалахда идарайринни карханайрин регьберри, хуьрерин кьилери, школайрин директоррини завучри, общественный тешкилатрин векилри ва теклифнавай маса ксари иштиракна.
“Районда образованидин кесерлувал гьикI хкажда?” важиблу месэладиз талукьарнавай мярекат, сифте гаф рахуналди, Ахцегь райондин кьил Осман Абдулкеримова ачухна ва райондин Общественный Палатадин председатель Али Исмаилова кьиле тухвана.
Мярекатдал кар алай доклад образованидин месэлайрай Общественный Палатадин член, тарихдин илимрин кандидат, Хуьруьгрин юкьван чирвилерин школадин директордин везифаяр тамамарзавайди тир Мамед Агьмедова авуна.
Адалай гуьгъуьниз вичин фикирар Ахцегьрин 1-нумрадин школадин завуч ва математикадин муаллим Шараф Муспагьова лагьана. “КIелунин предметрай школайриз герек учебникрин чкадал программайрив кьан тийизвай, яни истемиш тавунвайбур къвезва. ЧIехи классра, месела, мединститутдик экечIун патал герек химиядин, биологиядин тарсарай гьафтеда са сят ава — им лап тIимил я. Гьавиляй 10-11-классра профильный учебный планар туькIуьрунин чарасузвал ава. Чна неинки хъсан кIелзавай, гьакI ЕГЭ вахкуз тежезвай аялрикайни фикирна кIанда. 9-классдилай кьулухъ абур чпиз ашкъи-гьевес авай рекьерай пешекарвилин юкьван чирвилерин идарайриз тайинарайтIа хъсан я. Лугьузвайвал, 2020-йисалай къецепетан чIалайни чарасуз вахкун лазим тир ЕГЭ жезватIа, адаз къемаз талукь тир гьазурвал — база яратмишун лазим я”, — теклифар гана ада.
Инал образованидин ери хкажунин карда къиметлу теклифар гваз гьакI райондин культурадин управленидин (УК) начальник Ширинбег Мусаев, Ахцегь телевиденидин (АТВ) директор Таира Мегьарамова, 1-нумрадин АСОШ-дин директор Сафинат Мамаева, райондин Общественный Палатадин член, зегьметдин ветеран Къардаш Мамалиев ва масабурни рахана.
— Чкайрал школайра ва санлай районда чирвилерин ери, кесерлувал хкажун патал школайрин директоррини завучри вуч ийизва ва абуруз гьихьтин теклифар ава? Школада образованидин къурулушдин, кьилди директордин гьуьрмет, эвелимжи нубатда, гьахъ-адалат (муаллимриз кIвалахдин сятер, шартIар, яни зегьметдал гьевеслу ийидай гьакъи дуьз паюн) авай чкада лазим дережадиз хкаж жеда…,- заседанидин кIвалахдин нетижаяр кьуналди къейдна райондин регьбер Осман Абдулкеримова ва образованидин кесерлувал хкажунин гьакъиндай къиметлу вири теклифар кIватIна, тартибдиз гъана ва гьафтедин къене абур райадминистрациядив агакьарунин тапшуругъ гана.
Мярекат О.Абдулкеримова муниципалитетдин ГО ЧС-дин Управленидин начальник Сердер Моллалиевав МЧС-дин рекьяй чи район республикада 1-чкадиз лайихлу хьайивилин яржар — 1-дережадин Диплом ва махсус кубок вахкуналди акьалтIна. Ада райондин вири агьалийрин патай и къуллугъдин коллективдиз чIехи агалкьун тебрикна.
Дашдемир Шерифалиев
