ЦIийи ктабар
И йикъара Махачкъаладин “Мавел” чапханада “Бубадин веси” тIвар алаз зегьметдин ветеран, Дагъустан Республикадин культурадин лайихлу работник Гьемдуллагь Минетуллагьович Бабаеван ктаб акъудна.
Кьве вишни кьудкъанни муьжуьд чиникай ибарат тир адан тираж 300 экземплярдиз барабар я. Ктабдин жилдинал автордин — Гь.Бабаеван ва Ахцегьрин хуьруьн къадим магьлейрикай садан шикилар ала. Ктабдиз сифте гаф райондин “ЦIийи дуьнья” газетдин кьилин редактор, Дагъустан Республикадин культурадин лайихлу работник, журналист Дашдемир Шерифалиева кхьена.
Гьемдуллагь Бабаеван 80 йисан юбилейдихъ галаз алакъалу яз гьазурай и ктаб, шаксуз, адан яратмишунрал рикI алай вирибур патал хъсан савкьат хьана. Гьемдуллагь Бабаев вичиз Аллагьди мердвилелди са шумуд рекьяй бажарагъ, алакьунар ганвай ва абур жемятдиз къуллугъунин рекье эцигнавай бахтлу ксарин жергедай я. Инсанриз ам гьеле фадлай инихъ шаир, актер, манидар, мухбир, художник, устIар, драматург, фекьи, режиссер ва муаллим, гьажи яз чида. Адан тIвар неинки са Ахцегь районда, гьакI адалай къеце патани машгьур я…
“Бубадин веси” ктабда гьатнавай саки вири материалар гьар жуьре йисара “ЦIийи дуьнья” газетдин чинра чап авурбур я.
Рашид МУРСАЛОВ,
Ахцегь райондин “ЦIийи дуьнья”газетдин жавабдар секретарь,
РД-дин культурадин лайихлу работник
