Коронавирусдин цIийи азардихъ галаз женг чIугун патал Дагъустандиз чара авунвай пулдин кьадарди къенин юкъуз саки 12 миллиард манат тешкилзава. Идакай Дагъустандин Гьукуматдин Председателдин Сад лагьай заместитель Анатолий Къарибова региондин кьилин везифаяр вахтуналди тамамарзавай Сергей Меликовахъ галаз кьиле фейи совещанидал хабар гана.
“ИкI, мартдилай октябрдал къведалди вахтунда Дагъустанда коронавирусдин азардихъ галаз женг чIугунин серенжемриз 11 миллиардни 901 миллион манат харжнава. Идакай федеральный бюджетдай — 9 миллиардни 532 миллион манат, амай такьатарни республикадин бюджетдин гьисабдай чара авунва”, — раижна ада.
Ада къейдна хьи, 8-октябрдиз адетдинди тушир стIалжемдик ва коронавирусдин азардик начагъзавайбур патал республикадин 52 идарада 3 агъзурни 244 чарпай гьазурнава.
“Республикада виридалайни гзаф кьадар чарпаяр коронавирусдин сад лагьай лепедин вахтунда ачухнай, абурун кьадар 9 201 тир. Алай вахтунда 3 244 чарпай ачухнава, азадбурун кьадарди -1 агъзурни 65, яни 32,8 % тешкилзава, им лагьайтIа, РФ-дин Минздравдин истемишунрихъ галаз кьазва. Начагъбурукай 126 кас реанимациядин ва интенсивный терапиядин отделенийра ава”, — алава хъувуна А.Къарибова.
Ада мадни къейдна хьи, апрелдин-майдин варцара коронавирусдин азардихъ галаз женг чIугун патал 10 агъзурни 236 кас медицинадин къуллугъчияр кIвалахдик кутунвай. “Исятда чина 4 131 кас азарлуйрин сагъламвилин къаравулда акъвазнава, абурукай 1,5 агъзур кас духтурар я”, — хълагьна ада.
Сентябрдин эхирриз Дагъустандин кьиле авай ксари коронавирусдин цIийи азардихъ ва стIалжемдихъ галаз алакъалу яз республикада гьалар хъсан патахъ дегиш жезвайди, региондин азарханайриз аватзавайбурун кьадар 1,3 сеферда тIимил хьанвайди раижнай.
«Лезги газет»
