Дагъустандин властри йисан эхирдалди бейкарвал арадай акъудунин мураддалди кIвалахдин 35 агъзурдав агакьна чкаяр арадал гъун пландик кутунва. Алай вахтунда тайинарнавай пландин са паюнилай гзаф кIвалахдин цIийи чкаяр кардик акатнава. ТАСС-ди хабар гузвайвал, идан гьакъиндай республикадин экономика ва мулкар вилик финин рекьяй министр Гьажи Султанова малумарна.
“Чна вири хилера, идарайра, муниципалитетра кIвалахдин чкаяр арадал гъунин планар тестикьарнава. Планда йисан эхирдалди кIвалахдин 35 агъзурдав агакьна чкаяр арадал гъун къалурнава. Алай вахтунда 18 агъзурдав агакьна кIвалахдин чкаяр тешкилнава — им тайинарнавай пландин 52 процент я. Вири хилерай, кьилди къачуртIа, хуьруьн майишатда авай вири мумкинвилер кардик кутунва, гьа гьисабдай яз — вахтуналди ва сезондин кIвалахдай чкаяр тешкилун патални”, — лагьана Гь.Султанова.
Адан гафаралди, алай вахтунда Дагъустанда бейкарвили 9,9 процент тешкилзава. Им, алатай йисан и вахтунив гекъигайла, 6,7 сеферда гзаф я.
“Идан кьилин себебрикай сад — бейкарбуруз гузвай пулунин кьадар гзафарун я. Санлай къачурла, Дагъустандиз бейкарвиляй ва аялриз гун патал 23 миллиард манатдилай гзаф рекье туна ва гана. Ибур республикадин игьтияжар таъминарун ва экономикадиз куьмек гун патал хейлин такьатар я”, — къейдна министрди.
Адан гафаралди, алай вахтунда республикада гьам вахтуналди тир ва гьамни гьамишалугъ кIвалахдин чкаяр хуьруьн майишатда, образованидин, здравоохраненидин, физкультурадин ва спортдин хилера тешкилдай мумкинвилер ава.
«Лезги газет»
