Ихьтин лишандик кваз 11-октябрдиз Ахцегьа хуьруьнвийрин ва мугьманрин иштираквал аваз спортдин зурба серенжем кьиле фена. “Трезвая Россия” федеральный проектдин Дагъустанда авай координатор Шамил Алиева къейд авурвал, и серенжемдин макьсад, сифте нубатда, вири несилрин инсанрин — аялрин, жегьилрин, яшлубурун — арада сагълам уьмуьр кечирмишун пропаганда авун я.
Спортдин серенжемда диндин рекьяй векилри, общественный деятелри, спортдал машгъул ксарини иштиракна. Абурун арада Дагъустандин Муфтийдин куьмекчи Идрис Асадулаев, Ахцегь райондин кьилин заместитель Вадим Агъасиев, Олимпиададин чемпион, Дагъустандин физический культурадин ва спортдин рекьяй министрдин заместитель Гьайдарбег Гьайдарбегов, РД-дин милли политикадин ва диндин крарин рекьяй министрдин заместитель Мурад Шафиев, Дербент шегьердин администрациядин жегьилрин политикадин ва спортдин отделдин къуллугъчи Шамил Мегьамедов, Махачкъаладин 42-нумрадин школадин директор Тимур Саркаров ва гзаф масабур авай.
Гь.Гьайдарбегова, спортдин серенжем тешкилайбуруз сагърай лугьунихъ галаз сад хьиз, ихьтин мярекатрин важиблувал къейдна, районда абур кьиле тухун адетдиз элкъведайдахъ умудлувал къалурна.
Ахцегь райондин агьалийрин спортдин уьмуьрда и югъ, дугъриданни, лишанлуди хьана. ГьикI хьи, и юкъуз КьакIарин хуьре, машгьур общественный деятель Мегьамедгъани Гъаниеван экуь къаматдиз бахшна, спортдин милли жуьрейрай (идалай вилик йисарани тухун адетдиз элкъвенвай) турнирни кьиле фена.
«Лезги газет»
