И мукьвара Чечнядин меркез Грозныйда боксдай СКФО-дин чемпионат кьиле фена. Ана округдик акатзавай вири республикайрин, гьа гьисабдай яз Дагъустандинни, гьакI Ставрополдин крайдин викIегь боксёрри чпин гъутарин алакьунар къалурна.
Чи республикадай и чемпионатда иштиракайбурукай 12 спортсменди кIвенкIвечи чкаяр кьуна. Абурукай 5 — къизилдин, 3 — гимишдин ва 4 буьруьнждин медалриз лайихлу хьана. Идалди Дагъустандин хкянавай командади 1-чка кьуна.
Шадвилелди мадни а кардикай хабар гуз кIанзава хьи, къизилдин медалриз лайихлу хьайи спортсменрин арада чи ватандашар тир Арсен Магьмудов (60 кг) ва Омар Айдемиров (91 кг-дилай артух заланвал авайбурун арада) ава. СКФО-дин чемпионатдин бягьсерин нетижайриз килигна, абуру кьведани Дагъустандин хкянавай командадик кваз гила Россиядин чемпионатда чпин устадвал къалурда.
Жегьилриз къазанмишнавай агалкьун Дагъустандин боксдин федерациядин регьбер, чи ватандаш Альберт Селимовани тебрикна, республикадин хкянавай командадихъ мадни зурба агалкьунар хьун алхишна.
«Лезги газет»
