Мегьарамдхуьруьн райондиз Россиядин Федерациядин транспортдин министерстводин векилар кIвалахдин рекьяй мугьманвиле атана. Идакай муниципалитетдин администрациядин пресс-къуллугъди хабар гана.
10-октябрдиз муниципалитетдин кьил Фарид Агьмедова Росгранстрой ФГКУ-дин руководителдин советник Михаил Семёновахъ галаз гуьруьш кьиле тухвана. Адан сергьятра аваз Россиядин Федерациядин государстводин сергьятдилай автомашинраваз элячIдай “Ярагъ-Къазмаяр” пункт цIийикIа туькIуьр хъувунин кIвалахар тамамаруниз талукь государстводин контракт уьмуьрдиз кечирмишунин месэлаяр веревирдна.
Райондин руководитель “Ярагъ-Къазмаяр” МАПП-дин тешкиллувилин (координационный) Советдин заседанидин протоколдихъ галаз таниш хьана. Ана цIийикIа тIуькIуьр хъувунин кIвалахрин сад лагьай пай кьиле тухузвай вахтунда транспортдин такьатар ахъайдай схема къалурнава. И карда кьилин макьсад Россиядинни Азербайжандин сергьятдин и мензилда, ремонтдин кIвалахриз кьецI тагана, учирда акъвазнавай кьезил ва пассажиррин автотранспорт гзаф кIватI тежедайвал авун я. Гуьгъуьнлай абур автомашинра аваз сергьятдилай ахъайдай “Тагьирхуьруьн-Къазмаяр” ва “ЦIийи Филер” пунктариз рекье тун теклифзава.
Терефри кьиле тухузвай кIвалахар сада-садахъ галаз алакъа хвена тамамаруниз талукь месэлаяр веревирдна.
“Чна са политика кьилиз акъудун — Россиядин Федерациядин Президент Владимир Путина региондин ва муниципалитетрин вилик эцигзавай месэлаяр гьялун патал зегьмет чIугвазва ва чи макьсадни умумиди я — чи халкьдин, агьалийрин, Ватандин хушбахтвал патал кIвалахун”, — къейдна Ф.Агьмедова гуьруьшдал.
Эхирдай райондин кьили гуьруьшда иштиракзавай жавабдар къуллугъчийриз, и проект кьилиз акъуддайла, арадал къведай вири месэлаяр гьялунин карда куьмекунин тапшуругъар гана.
«Лезги газет»
