Алатай гьафтеда Дагъустан Республикадин Кьилин къуллугъ вахтуналди тамамарзавай Сергей Меликов республикадин общественностдин векилрихъ галаз гуьруьшмиш хьана. Идан гьакъиндай “Лезги газетдиз” РД-дин Кьилин Администрациядин ва Гьукуматдин пресс-къуллугъди хабар гана.
КIватI хьанвайбур тебрик авуналди, Сергей Меликова къейдна хьи, гьукумдин органриз общественностдин, адан активный векилрин иштираквал авачиз республикадин вилик акъвазнавай месэлаяр гьялун четин жеда…
Гуьруьшдал РД-дин Кьилин къвалав гвай агъсакъалрин Советдин председатель Абдула Мегьамедовни рахана. Кьилди къачуртIа, ада лагьана хьи, гьеле вири чиновникар халисан пешекарар туш. Абуруз чидайди пуд “к” я — кабинет, клавиатура ва кофе.
“Виняй тапшуругъар гуьзлемишна кIандач, яратмишдай тегьерда кIвалахун герек я. Гьа ихьтин крар себеб яз бязи вахтара хейлин руководителрихъ галаз гуьруьшмиш жез, абурухъ галаз общество патал кар алай месэлаяр веревирд ийиз жезвач”, — малумарна Абдула Мегьамедова. Идахъ галаз сад хьиз ада гьукумдин къуллугъчийриз мукьвал-мукьвал районриз фин теклифна.
“РФ-дин Президент Владимир Путинахъ галаз гуьруьшмиш хьайила ва мукьвара чи арада хьайи рахунрани за къейднай хьи, тIугъвалдихъ галаз женг чIугунихъ ва региондин экономика вилик тухунихъ галаз сад хьиз, чиновникри агьалийрихъ галаз гьакъикъи алакъа хуьнни важиблу я. Эгер чна пуд “к” жуьреда кIвалахиз хьайитIа, са алакъани жедач. Къенин чи гуьруьшни санал кIвалахунин жигьетдай сифте кам я. Идалайни гъейри, шегьеррин кьилерихъ хьиз, зун районрин кьилерихъ, анрин агьалийрихъ галазни гуьруьшмиш жеда. Заз чидайвал, са гьихьтин ятIани месэла гьялдалди вилик, ам руководителрин докладрай ваъ, инсанрихъ галаз веревирд авуналди чирна кIанда. Чиновникарни чпин къуллугърал гьавиляй алайди я”, — баянар гана Сергей Меликова.
Гьа са вахтунда ада алава хъувуна хьи, вучиз ятIани, обществодин са паюни татугай крариз гзаф фикир гузва. “Чна, Дагъустанда вири пис я лугьуз, ара-бир чун гатазва. Вучиз чаз Дагъустанда авай хъсан, къени крар аквазвач? Чна чаз гьуьрмет авун, чаз чи республикадиз хас хъсан крар акун лазим я. Абурни чахъ ава: дагълар, гьуьл, рагъ, къенин ва чIехи несилрин агалкьунар. Илимда, медицинада, спортда ва маса хилера къазанмишзавай агалкьунрикай чна гьамиша лугьун лазим я”, — къейдна С.Меликова.
«Лезги газет»
