13-октябрдиз Мегьарамдхуьруьн районда Ярагъ Мегьамед эфенди рикIел хуьниз талукьарнавай республикадин дережадин форум кьиле фена. Аниз Дагъларин уьлкведин вири пипIерай диндин хейлин къуллугъчияр, алимар, общественный деятелар атанвай. Мярекатдин гьуьрметлу мугьманрин арада  Дагъустандин муфтийдин заместитель Агьмад Къахаев, РД-дин милли сиясатдин ва динрин крарин рекьяй министерстводин управленидин начальник Расул Гьажиев, тарихдин илимрин доктор, профессор Замир Закарияев, Кеферпатан Кавказдин исламдин рекьяй ахтармишунардай Центрадин директор Руслан Гереев ва маса ксар авай. Райондин агьалияр ва мугьманар муниципалитетдин кьил Фарид Агьмедова тебрикна.

“Дагъустанда дегь девиррилай инихъ хейлин халкьар, жуьреба-жуьре динрал амалзавай агьалияр яшамиш жезва. Идахъ­ галаз алакъалу яз ислягьвал, хъсан къуншивилин ва дуствилин алакъа­яр хуьн чи гъвечIи ватанда гьалар пайгар­дик хьунин, адан абадвилин чарасуз шартI яз хьана.

И келимайри чпин важиблувал къени квадарнавач. Дагъустандин Кьилин везифаяр вахтуналди тамамарзавай Сергей Алимович Меликова и мукьвара респуб­ли­­кадин Халкьдин Собранида кIватI хьанвайбурун вилик экъечIна рахадайла, гзаф мил­летрин векилрикай ибарат хьун ва жуьреба-жуьре динрал амал авун хьтин чи на­дир кьетIенвилер хуьнин ва абурукай дуьз­даказ менфят къачунин важиблувал къейдна.

Къенин форум чна, чи обществода милли кьетIенвилер, дуствал ва ислягьвал хуьниз къуват гудайвал, вирида санал кьиле тухун лазим тир кIвалахдин къа­­къудиз тежер пай я.

Чи халкьар тупламишунин ва руьгьдин жигьетдай хкаж хьунин карда мусурманрин зурба философ, руьгьдин регьбер, Дагъустандинни Чечнядин имамрин насигьатчи хьайи Ярагъ Мегьамеда чIехи роль къугъвана.

Квехъ галаз санал чаз чизвайвал, ам гегьенш ва дерин чирвилер авай кас тир ва ада вичин девирда жемиятдинни сиясатдин барадай  арадал къвезвай гьалариз еке таъсир авуна.

Ярагъ Мегьамедан илимди къени Да­гъустандин халкьар руьгьдин жигьетдай савадлу авуниз, ислягьвал ва халкьарин садвал мягькемаруниз къуллугъзава.

Ада тунвай руьгьдин ирс амукьун, ада акьалтзавай несилдиз къуват гун ва чи обществода адет хьанвай ивирар хуьниз куьмек гун лазим я.

Къенин форум кьиле тухунин асул макьсадни гьа идакай ибарат я. Либеральный ивирар лугьудайбур раиж ийиз, адет хьанвай ивирривай къерех жезвай общество гьикI усал жез башламишзаватIа, гьа кар квехъ галаз санал чаз Европадин уьл­­квейрин мисалди къалурзава.

И форум тешкилуниз къуват гайи Да­гъустан Республикадин милли сиясатдин ва динрин крарин рекьяй министерст­во­диз, республикадин Муфтиятдиз за сагърай лугьузва. И мярекатда иштиракдай вахт ва мумкинвилер жагъурай вирибурулай зун рази я”, — лагьана Фарид Агь­ме­дова, мярекатдин иштиракчийрихъ элкъвена.

Дагъустандин муфтий Агьмад гьажи Абдуллаеван ва республикадин милли сиясатдин ва динрин крарин рекьяй министр Энрик Муслимован тIварунихъ тебрикдин келимаяр Агьмад Къахаева ва Расул Гьажиевани лагьана.

Руслан Гереева вичин рахунра форумдин иштиракчийрив Туьркияда, Египетда ва Германияда авай лезгийрин диаспорайрин векилрин патай разивилин келимаяр агакьарна.

Профессор Замир Закарияева шейх Ярагъ Мегьамедан уьмуьрдиз ва кIвалах­диз талукь итижлу доклад авуна.

Форумдин сергьятра аваз шабагьар вахкунин серенжемни кьиле фена. Да­гъус­­тандин муфтийдин тIварунихъай ­Фа­рид Агьмедовав тIвар кхьенвай сят вах­кана. РД-дин муфтийдин заместитель Агьмад Къахаев “Мегьарамдхуьруьн райондин гьуьрметлу ватандаш” лагьай тIвар­цIиз лайихлу хьана. Фарид Агьмедо­ва Дагъустан­дин Огни шегьерда авай Ярагъ Мегьамедан тIварунихъ галай медресадин векилрив шейх Ярагъ Мегьамедан суьрет вахкана.

Лезги театрдин артистри, машгьур шейх­­дин, арифдардин, насигьатчидин муь­тIуьгъ тахьай руьгь къалуруналди, инсандин лайихлувал вине кьунихъ, хайи чил хуьнихъ элкъуьрнавай насигьатар раиж авуналди, сегьнедилай Мегьамед Ярагъидин уьмуьрдай чIук къалурна.

Ярагъ Мегьамедан дунда аваз сегьнедиз Россиядин лайихлу артист Абдуллагь Гьаби­бов экъечIна. Адаз миллетрин арада ислягьвал ва меслятвал мягькемарунай медални гана.

Форумдин программадин сергьятра аваз, Хайрат дестедин бажарагълу аялрин  нашидрин сесерик кваз чIемерукдай лишанар ягъу­нин спортдин акъажунар кьиле тухвана, гьакI­ни, шейх Ярагъ Мегьа­медан руьгьдиз бахшна, форумдин вири иштиракчияр патал суфраяр ачухна.

Къейд авун лазим я хьи,  Ярагъ Мегьа­мед­ рикIел хуьниз талукьарнавай республикадин дережадин форум икI пуд лагьай­ сеферда тухвана.

«Лезги газет»