И йикъара Кьурагьрин спортдин дворецда райадминистрациядин физкультурадинни спортдин ва жегьилрин крарин рекьяй отделди, СССР-дин спортдин мастер Неби Камалдинован экуь къамат рикIел хкуниз бахшна, мектебра кIелзавай аялрин арада азаддаказ кьуршахар кьунай турнир кьиле тухвана.
Адан макьсад районда спортдин и жуьре машгьурун, райондин хкянавай команда патал резерв гьазурун, гьакIни Н.Камалдинова спортда къазанмишнавай агалкьунриз къимет гун тир. Ери-бине Гельхенай тир Неби Мегьамедовича вичин девирда дзюдодай Дагъустандин чемпионвилин тIвар са шумудра къазанмишнай. Ам гьакIни мастервилин турниррин гъалибчини хьанай. Спортдин рехъ акьалтIарайла, ада Гельхенрин СОШ-да муаллим ва тренер яз зегьмет чIугунай. Адан гъилик вердишвилер къачур гзаф жегьилрихъ хъсан нетижаяр хьанай.
Турнирда 80 спортсменди иштиракна. Заланвилин 13 категориядай тамам 6 сятда къизгъиндаказ кьиле фейи акъажунра жегьилри чпин устадвал къалурна. Судьяйри гъалиб хьайибур тайинарна. Абурув (ва кьилдин пишкешриз лайихлу хьайибурув) райондин отделдин начальник Р.Рамазанова медалар, грамотаярни къиметлу пишкешар вахкана ва турнирдин кьилин спонсор, Неби Мегьамедовичан стха Керим Камалдиноваз (ам азаддаказ ва грекринни римлуйрин жуьреда кьуршахар кьунай спортдин мастер я, адакай 1985-йисуз Дагъустандин чемпион хьанай. Алай вахтунда ада Москвада военный духтур яз кIвалахзава) сагърай лагьана.
«Лезги газет»
