Айсберг океанда ва я гьуьле жедай муркIадин чIехи къаяб я. Адаз гьатта муркIадин дагъни лугьуз жеда. Виридалайни чIехи айсбергар Антарктидада гьалтзава. 1956-йисуз Америкадин муркIар хадай “Глейшер” гимиди 350 километр яргъивал ва 40 километр гьяркьуьвал алай айсберг дуьздал акъудна. Кеферпатан полушарида малум хьайи виридалайни еке айсбергдал 10 километр яргъивал, 5 километр гьяркьуьвал алай. Ам 1882-йисуз Баффиновадин Земляда дуьздал акъудна.
1912-йисуз айсбергда акьунин нетижада “Титаник” тIвар алай чIехи гими цин кIаниз фенай. Мусибатдин дуьшуьшдикди 1500 кас кьена. Адалай кьулухъ США-дин ВМС-дин гидрографический управлениди Кеферпатан Атлантикада муркIадин патрулдин къуллугъ тешкилунин теклиф гана. Къуллугъ кардик акатайдалай инихъ бедбахтвилин агьвалатрин кьадарни тIимил хьана. ЯтIани, це сирнавзавай муркIадин дагъларин хаталувал квахьнавач, иллаки — циф авай вахтунда.
«Лезги газет»
