26-сентябрдиз Белиж поселокдин стадиондал “Спорт терроризмдиз, экстремизмдиз, наркотикриз акси я” лишандик кваз поселокдин школайра кlелзавай жаванрин арада велоспортдай ачух турнир кьиле тухвана. Ам башламишдалди, Дербент райондин кьилин заместитель С.Эмиргьамзаев, Белиж поселокдин кьил Р.Гьабибулаев, “Леки” велоспортдин клубдин регьбер Р.Апаев кьиле аваз марафондин иштиракчийри стадиондилай поселокдин центрадиз кьван ва кьулухъди велосипедар гьална.
Турнир, адан иштиракчияр тебрик авуналди, Р.Гьабибулаева ачухна. Анал рахай С.Эмиргьамзаева, Дербент райондин физический культурадин ва спортдин рекьяй отделдин начальник А.Ханмегьамедова, Р.Апаева ва масабуру велоспорт олимпиададин къугъунрин вири жуьрейрик квайдакай, сагълам уьмуьр тухун патал адахъ авай еке метлебдикай лагьана ва иштиракчийриз агалкьунар хьун алхишна.
Яшарин 4 категориядиз килигна кьиле фейи ачух турнирда вишелай виниз велосипедистри иштиракна. ИкI, 300 метрдилай 1200 метрдал кьван мензилдиз (яшариз килигна) велосипедар гьалунай Белиждин гимназиядин команда -1, Г.Лезгинцеван тlварунихъ галай школадин команда — 2 ва Белиждин 1 ва 2-нумрайрин школайрин командаярни 3-чкайриз лайихлу хьана. Чпин яшариз килигна категорийрай кlвенкlвечи чкаяр Т.Насруллаева, А.Рамазанова, Г.Салманова ва Р.Идрисова кьуна.
Къагьриман Ибрагьимов
