Чи ватанэгьлияр — гьар сана

И мукьвара чаз мад са жегьил ватанэгьлидин агалкьунрикайни алакьунрикай хабар хьана.  Ихтилат машгьур ватанэгьли, карчи, ракьун рекьерай нафтIадинни газдин парар тухунал машгъул “СГ-транс” ОАО-дин директоррин советдин председатель  Тимур  Салманович  Бабаевакай  я.

Ам ракьун рекьерин хиле чIехи ва жавабдар къуллугъар кьилиз акъудай зурба пешекар, ери-бине Сулейман-Стальский райондай тир Салман Бабаеван хизанда 1985-йисан 24-июлдиз Хабаровск шегьерда дидедиз хьана.

Салман Мегьамедрасуловича алатай йисара “РЖД”  ОАО-да коммерциядин рекьяй вице-президент яз кIвалахна. Ада хайиди тир Сулейман-Стальский район патал мергьяматлувилер гзаф авунва ва и кар исятдани давамарзава.

2002-йисуз Москвада мектеб куьтягьайдалай ­кьулухъ Тимур Бабаев меркездин вуздик (универ­ситет путей сообщения, МИИТ) экечIна ва  2007-йисуз анаг “экономист (финансрин менеджмент)” пеше­дай акьалтIарна. Илимдин рехъ давамарунин мурад рикIе авай жегьилди 2010-йисуз “Экономическое обос­нование программы обновления подвижного состава транспортной грузовой компании” темадай эко­номикадин илимрин кандидатвилин диссертация хвена.

Т.Бабаева вичин зегьметдин рехъ 2007-йисуз РЖД-да пешекардин къуллугъдилай башламишна. 2010-йисуз цIивин, эцигунрин тадаракар, минеральный миянардай затIар ва чIулав металлар санай масаниз тухунал машгъул “Кьвед лагьай транспортдин компания” арадал гъана. ЦIийи тешкилатда Тимур инновациядин отделдин кьиле акъвазна. Кьве йисан муддатда кIвалахдин тежриба къачур жегьил пешекар “СГ-транс” тешкилатдиз хъфена. 1959-йисуз СССР-дин Главгаздин теклифдалди кардик кутур гьукуматдин и чIехи тешкилат 2004-йисуз ОАО-диз элкъуьрна. Алай вахтунда фирмадин гзаф  хилер-филиалар, ракьун рекьерай физвай улакьар ремонт авунин, абур синагъдай акъудунин пунктар кардик ква.

2011-йисалай Тимур Салманович ракьун рекьериз талукь улакьрин­ тешкилатра кьилин къуллугърал хьана. 2012-йисуз­ ам “СГ-транс” тешкилатдин ди­рек­тор­рин советдик экечIна ва гуьгъуьнлай адакай советдин кьил хьана. Директоррин советдин регьберди тешкилатдин асул вири крарал гуьзчивал тухузва. Ватанэгьлидин регьбервилик кваз директоррин советди кьилин фикир яшайишдин метлеб авай проектриз гузва. Карчивилин рекьяй “СГ-трансди” “Газ­пром нефть”, “Татнефть”, “Новатэк”, “ТАИФ”, “Роснефть” ва маса теш­килатрихъ галаз амадагвилин алакъаяр ­хуьзва.

Тимур Бабаев Дербент шегьерда кардик квай ­“Дербентская винодельческая компания” ООО-дин сагьиб­рикай сад я. Къейд ийин, и тешкилатдин са пай Тимур ва Руслан Бабаеври (стхаяр-кьветхверар) арадал гъан­вай “Тессера Инвест” (Москва) фирмадиз талукь я.

Т.Бабаеван хизанда кьуд рушаз тербия гузва. Азад вахтунда ватанэгьли балугъар кьунал, гьевескаррин командадик кваз хоккей къугъунал машгъул я.

Къуй чи ватанэгьлийрихъ гьар сана анжах агалкьу­нар хьурай!

«Лезги газет»