Дагъустандин здравоохраненидин министерстводин сайтда хабар ганвайвал, республикадин садакай масадак акатдай азаррин центрада (ам вакцина хуьн патал алай аямдин холодильникралди таъминарнава) и йикъара коронавирусдиз акси рапар яна. ЧIуру азардиз акси иммунитет арадал атун патал рапар ягъай сифтебурун жергеда Буйнакск шегьердин центральный больницадин духтурар ава. Къейд авун лазим я хьи, рапар ядалди виликамаз авур анализрин куьмекдалди абурук КОВИД-19 азар, гьакIни адан антитела кватIа ахтармишна. Коронавирусдиз акси рапар анжах ам квачирбуруз язавай.
Рапар янавай духтурри къейдзавайвал, абурун гьал хъсанзава, дармандин мумкин тир чIуру таъсир (побочное действие) абурухъ авач.
— Чун чIуру азардихъ галаз женгина, лугьурвал, эпицентрада хьана, чаз азарлу хьанвайбур, рекьизвайбур акуна. Алай вахтундани азардал гъалибвал къазанмишнавач. За гьисабзава, азардиз акси рапар ягъун адан вилик пад кьунин карда виридалайни хъсан къайда я. За рапунин таъсир жувал гьиссун кьетIна, — лагьана Буйнакскдин ЦГБ-дин эпидотделдин заведующий Къистаман Акамовади.
РикIел хкин: КОВИД-диз акси вакцинадин 42 доза республикадиз сентябрдин юкьвара агакьарнай. Кьве компонентдикай ибарат тир дарман Академик Гамалеян тIварунихъ галай эпидемиологиядин ва микробиологиядин ахтармишунрин Милли центрадин алимри арадал гъана. Мукьвара и вакцина республикадиз мадни агакьун гуьзлемишзава, амма адан кьадар гзаф туш. Сифте нубатда и рапар азардихъ галаз женгина авайбуруз — медицинадин хиле зегьмет чIугвазвайбуруз — ягъун пландик ква.
Къейд авун лазим я хьи, КОВИД-диз акси рапар анжах гуьгьуьллудаказ язава. Вакцина санай масаниз агакьарун ва ам хуьн патал махсус жуьредин холодильникрикай менфят къачузва.
«Лезги газет»
