Алай йисан 21-сентябрдиз тIвар-ван авай алим, арабист, востоковед, агъахъартасви Рзадин хва Амри Шихсаидов чи арада амачиз са йис тамам хьана. И вакъиадихъ галаз алакъалу яз, мукьвара Сулейман-Стальский райондин Агъа Хъартасрин хуьруьн мектебда ам рикIел хкуниз талукьарнавай межлис кьиле фена.
Мектебдин директор Эрзиман Ибрагьимова ачухай мярекатдин сергьятра аваз рахайбуру Амри Шихсаидован уьмуьрдин ва кIвалахдин рекьикай, хизандикай, акьалтзавай несилриз гайи тербиядикай, Дагъустан патал тунвай ирсиникай суьгьбетна.
ЧIехи алимдин уьмуьрдин ва зегьметдин рекьикай кхьенвай макъалаяр “Лезги газетдиз” садрани кьведра акъатнач. Гьавиляй абур тикрар хъувунин игьтияж авач. Амри Шихсаидован уьмуьрдиз талукь са бязи малуматар (халкьдин гегьенш къатариз са акьван таниш тушир) къейд тавунани жедач.
Алим вичин уьмуьрдин юлдаш Рея Сергеевнадихъ галаз университетда таниш хьанай. Кьисметар сад авуна, хизан кутуна, кьве руш чIехи авуна — Наталья ва Ольга. Рагьметлу алимди вичин хтулрал — Саид ва Сиражудин Муртузалиевичрал — хайи веледрал кьван дамахзавай! ЧIехи бубадин тIвар Сиражудин Гьажиеван хцел-Амри Шихсаидован птулдал эхцигнава…
РикIел хкунин межлисдал Агъа Хъартасрин мектебдин гъвечIи классрин муаллим Гуьлназ Ибрагьимовади Эрзиман Ибрагьимова Амри Рзаевичан экуь къаматдиз бахшна кхьенвай шиир кIелна. Ам чна газет кIелзавайбурузни теклифзава.
Чавай багъри кас къакъатна
Араб чIалан еке устад,
Хизандивай къакъатна фад,
Мукьва хьайи Ленинград
Чавай багъри кас къакъатна.
Я багьа кас, я чи къизил,
Вучиз туна на чун сефил?
Йис атIанва — дерт туш кьезил,
Чавай багъри кас къакъатна.
Гьайиф текъвез чандин сагъвал,
Хиве такьур гьич начагъвал,
Гьамишалугъ бажарагъвал
Хас тир кьегьал кас къакъатна.
Шадарзавай вири алем,
Гъиле авай илимд къелем,
Дуьньядиз машгьур тир алим,
Чавай багъри кас къакъатна.
Гьасан эфендидин неве,
Еке къастар туна хиве,
КIвалахдани хьайи кIвенкIве,
Чавай багъри кас къакъатна.
Хуш келима мецел алай,
Пекдин перде рикIел алай,
Гьамиша кьил-кьилел алай,
Чавай багъри кас къакъатна.
Вун рикIерай акъатдач чи,
Хуьда чна ви ирс вири,
Гьакьван багьа, рикIиз чими
Чавай багъри кас къакъатна.
Чи мухбир
