Россиядин сергьятрин мензилар фикир желбдайбур я. Им мягьтел жедай делилни туш, вучиз лагьайтIа чун дуьньяда виридалайни чIехи уьлкведа яшамиш жезва. Адан сергьятар гьам кьураматрал, гьам церални ацалтзава. Бязи чкайра сергьятдин еринда дагълари ва вацIари къуллугъзава. Санлай уьлкведин майдан чIехи тирвиляй чаз адан гьар са пипIикай тамам делилар чир тахьун тIебии кар я. Ингье бязи делилар.
— Майдандал гьалтайла, Россия США-дилай 1,8 сеферда чIехи я.
— Россия дуьньяда вичин къерехар 12 гьуьлуь кьунвай тек са уьлкве я.
— РФ-динни США-дин арада 4 километр мензил ава.
— Россиядиз Япониядихъни США-дихъ галаз авайди анжах гьуьлуьн сергьятар я.
— Белоруссияда Саньково-Медвежье тIвар алай анклав (Россиядин мулкарин чIук) ава, ам кьуд патай Белоруссиядин чилери кьунва.
— Россиядиз 13 уьлкведихъ галаз гьуьлуьн сергьятар ава.
— Дуьньяда виридалайни гзаф къунши уьлквеяр Россиядихъ ава.
— РФ-да “сирлудаказ” лишандалди къейднавай 15 шегьер малум я. Абур картайрани къалурнавач.
— Нарва шегьер кьве уьлкведиз талукь я — Россиядиз ва Эстониядиз. Шегьер кьве чкадал пайнава, адан урус паюниз Ивангород лугьузва.
— Чилел Россиядин сергьятар ФСБ-ди хуьзва, гьавада — ПВО-ди, цин кIаник — ВМФ-ди.
— Маса гьукуматрихъ галаз авай Россиядин часпарар фикирда кьуртIа, абурун 75 процент церал ацалтзава, 25 процент – кьураматдал.
— Россиядиз 18 уьлкведихъ галаз сергьятар ава, гьа жергедай яз гьеле тамамвилелди тестикь тахьанвай республикаяр яз гьисабзавай Кьиблепатан Осетиядихъ, Абхазиядихъ галазни.
— Къазахстандихъ галаз авай часпар Россиядин виридалайни яргъиди я (саки 7600 километр).
«Лезги газет»
