Гатфарин са юкъуз Докъузпара райондин Къурушрин хуьряй Дербентдиз сиве-сивди ацIанвай маршрутка физвай. Текийрин хуьруьв агакьайвалди, улакь акъвазна. За шофердивай улакь акъвазарунин себеб вуч я лагьана, хабар кьуна. Вич лугьумир, рехъ ацахьнавай кьван. И макъамда за Текийрин хуьруьз маршрутка гьалзавай Мугьубетаз зенгна. Чи гьарайдиз атана, ада машинда авай вири ксар вичин улакьда ахцукьарна, райондин центрадиз тухвана. Райондин рекьер къайдадик кутунал машгъул отделенидив рекьин гьалдикай хабар агакьарна.
Дагъдин мулкара ихьтин вакъиаяр мукьвал-мукьвал арадал къвезва. Амма рехъ тади гьалда туькIуьр хъувун, улакьрин гьерекат гуьнгуьна хтун эвелимжи месэла я. Вучиз лагьайтIа анай жемятдив недай чарасуз суьрсетар агакьарзава. Мадни, Аллагьди яргъазрай, са инсан начагъ хьайитIа, ихьтин дуьшуьшра “Тади куьмекдивайни” къвез жедач.
Чи хуьруьнви Рамидин Алхасов вичин ватандал кьил чIугваз хтана, жемиятдихъ галаз авай гьаларикай ихтилатарна. Рамидинан рагьметлу стха Фирудина алатай йисара вичин хсуси такьатрихъ Ахцегь райондай техника гъана, рехъ къайдадиз хканай. 2017-йисуз, рехъ тамамдиз живеди кьунвайла, Москвадин МЧС-дивай куьмек тIалабнай, нетижада Махачкъаладай чкадал махсус техника гъанай. Трактордал кIвалахай касдиз гатфар алукьдалди Фирудина вичин такьатрикай гьакъи гана.
Рамидин Алхасовани, стхади авур крарилай чешне къачуна, и мукьвара Текидилай Къурушдал кьван физвай рехъ туьхкIуьр хъувуна.
Ада кьилиз акъуднавай и хъсан кардилай вири къурушвийри разивалзава, ватанэгьлидиз алхишзава. Къуй адахъ агалкьунар ва сагъламвал хьурай!
Мегьамед Баширов
