Заз “Лезги газет” виш йиса авай жанлу жегьил хьиз аквазва. Ам женгинин балкIандал алай Шарвилидиз ухшар я. “Лезги газет” ЧIехи Октябрдин инкъилабди, Большевикрин (коммунистрин) партиядин таблигъатди ва Социалист гьукуматди чи халкьдиз багъишнавай Рагъ я. Адаз халкьди нубат алаз “Лезги Рагъ” лугьузва.
Виш йисуз газетдин тIварар дегиш хьана: “Дагъустандин кесибар” — “Советрин Дагъустан” — “Самурдин кесибар” — “ЦIийи дуьнья” — “Социализмдин пайдах” — “Коммунист” — “Лезги газет”.
Виш йисуз чи, Акимоврин, кIвализни хквезва: ада чаз ватандикай, халкьдикай, уьлкведикай ва дуьньядикай цIийи-цIийи хабарар гъизва. Газетдин чинриз 1958-йисалай зи эсерарни акъатзава.
1990-йисуз СССР кIудна, уьлкведиз капиталист къайдаяр хкайдалай гуьгъуьниз “Лезги Ракъинин” ишигъ, гьайиф хьи, йисалай-суз зайиф жезва. Зи фикирда мектебра аялри дидед чIал чирзавай сятер-тарсар тIимиларун, учебникар йисаралди акъуд тавун, художественный ктабрин тиражар 2-3 агъзурдалай 3 вишел хкун, “Лезги газетдин” объем тIимиларун ва тираж 18 агъзурдалай 6 агъзурдал хтун, милли газетарни журналар “кашал гъун” ва маса усалвилер ава. Абурун гьал заз гележегда мадни четин жедай хьиз аквазва. Ихьтин “тIегъуьндикай” милли басма (печать) хуьн чарасуз месэладиз элкъвенва.
Чи масан “Лезги газетдин” 100 йис тамам хьун за, чи халкьдин милли сувар яз, сифте газетдин редакциядин къагьриман коллективдиз, ахпа мухбирриз, газет кхьизвай, кIелзавай ватанперес стхайризни вахариз рикIин сидкьидай мубаракзава. Къуй чи халкьдин газетдин уьмуьр виш-виш йисаралди давам хьурай!
Гьаким Къурбан,
писатель, илимрин доктор, профессор
