Вичин ери-бине Сулейман-Стальский райондай тир И.Алискероваз талукь яз шад хабар и йикъара чав Бахрейндай агакьна. 17-сентябрдиз ина кьиле фейи BRAVE CF 41 турнирдин кьилинбурукай сад тир бягьсина Икрам Алискерова (KNK-Dagestan клубдин векил) ва Денис Тюлюлина (Evolve Fight клубдин векил) чпин устадвал ва алакьунар къалурна. Бягьсинин 3-раундда Икрама, гъилиз тIарвал гудай къайдадикай менфят къачуналди, Денисал гъалибвал къазанмишна. Мубаракрай!
Икьван чIавалди Денис Тюлюлина спортдин рекье вири гъалибвилер вахт куьтягь жедалди къазанмишнавайди тир. Икрам лагьайтIа, спортдин са шумуд жуьредай, гьа гьисабдай яз кьуршахар кьунайни хъсан гьазурлухвал, бажарагъ, тежриба авай спортсмен яз машгьур хьанва. Гьавиляй и гуьруьшди бягьсерал рикI алайбурун гьевес мадни хкажзавай.
РикIел хкин: гатуз, коронавирус себеб яз, и турнир са шумудра кьулухъ янавай. Эхирни ам 17-сентябрдал хкана. Кьве спортсмендини турнир башламишдалди вилик анжах кьве гьафте амаз ана иштиракунин къарар кьабулнавай.
«Лезги газет»
